Бала қауіпсіздігі үкіметтің отырысында талқыланды. Оқу-ағарту министрі Ғани Бейсембаев мектеп директорларының жауапкершілігін күшейтуді қолға алмақшы. Сондай-ақ, министр 2023 жылғы 1 наурыздағы жағдай бойынша бейнебақылау жүйелерімен білім мекемелері 100 пайыз қамтылған дейді. Ал Ішкі істер министрі Марат Ахметжанов Қазақстан мектептерінің 62 пайызы ғана Жедел басқару орталығымен біріктірілген бейнекамералармен жабдықталғанын айтады. Толығырақ тілші репортажынан.

Мектептегі қауіпсіздік мәселесі әлі де толық шешілмей отыр. Үкіметтің отырысында талқыланған басты мәселенің бірі-білім беру орындарында бала қауіпсіздігін қамту болды. Бірінен соң бірі жарыса есеп берген министрлердің мәліметтері сәйкеспей жатты. Ішкі істер министрі Марат Ахметжанов Қазақстан мектептерінің 62 пайызы ғана Жедел басқару орталығымен біріктірілген бейнекамералармен жабдықталғанын айтады. Кейбір облыстарда жағдай тіпті нашар. Мысалы, меткептердің Батыс Қазақстан облысында – 24, Алматы облысында - 35, Ақтөбе облысында - 41 пайызы ғана қамтылған. Ал Оқу-ағарту министрінің баяндауынша, 2023 жылдың екі айында бейнебақылау жүйелерімен білім мекемелері 100 пайыз қамтылған. Жедел басқару орталықтарына 6 мыңға жуық білім ошақтары қосылған. Мектептердегі күзет қызметі де толық шешілмеген.Бас полицей Марат Ахметжанов айтқандай, әлі күнге дейін кей мектептерді зейнет жасындағы қарттар күзетіп отыр. Үкімет басшысы мектептердегі қауіпсіздік мәселесін күшейтуді тапсырды. Смайылов ата-ана мектептегі баласының жағдайы мен қауіпсіздігі үшін алаңдамауы қажет деді.

Өздеріңізге мәлім, елдегі мектеп қауіпсіздігіне үкімет Татарстанда орын алған қайғылы жағдайдан соң кіріскен болатын. Алайда, қауіпсіздік мәселесі толық шешімін таппай отыр. Жақында Петропавл қаласындағы мектепте орын алған төтенше жағдай соның дәлелі. Мектепке балта мен пышақ алып кірген оқушының сыныптастарын жаралған әрекеті ата-аналарды алаңдатып отыр. Осы оқиға орын алғалы бір айға жуқытап қалды. Алайда, оқу-ағарту министрі төтенше жағдай болған өңірге әлі ат басын тіремепті. Министр енді барамын деп ақталды.

Өздеріңізге мәлім, шабуыл жасаған оқушы психиатриялық есепте тұрған. Министр Бейсембаев енді құзырлы министрлік тарапынан балалардың жүйке жүйесіне қатысты барлық мектептерде тексеріс жүргізілетінін айтады.

Сонымен қатар министр мектептерге кіруге рұқсат берудің жаңа тәртібі әзірленіп, енгізіледі. Балалар қауіпсіздігін қамтамасыз ету тұрғысынан тәрбие жұмысы жаңғыртылады деп отыр.

Елімізде бала қауіпсіздігі сақталып отыр ма? Соңғы күндері шыққан ақпараттарға сәйкес, балалардың қауіпсізідін қамту мәселесі қоғамда сұрақ тудырып отыр. Жамбыл өңірінде жаңа туған сәбиді сатып жіберді деп күдікке ілінген дәрігерлердің мәселесі. Атырауда сәбиге хиджама жасаған емшінің әрекеті қоғамды қызу талқыланып жатыр. Осыған орай Денсаулық сақтау министрі Ажар Ғиният өз пікірін білдірген еді.

Өздеріңізге мәлім, Жамбыл облысы Полиция департаментінің қызметкерлері қаңтрадың 12 күні Тараз қаласы прокуратурасымен бірлесіп жүргізген арнайы іс-шара барысында жаңа туған баланы сату дерегін анықтады. Нәрестені акушерлер 1,5 миллион теңгеге сатпақ болған. Қазір күдіктілер қамауда отыр. Олар босанған әйел баласынан бас тартатынын естіп, сәбиді делдал арқылы асырап алғысы келетін адамға сатуға келіскен. Бұл іске қатысы бар барлық адам анықталып жатыр. Әлгі дәріргерлер 9 жылдан 12 жылға дейін сотталуы мүмкін. Сәби қазір балалар үйінде. Ал қол астындағылары бала саудасымен айналысып жатқанда денсаулық сақтау минситрі қандай шара қолданады екен.

АЖАР ҒИНИЯТ – ҚР ДЕНСАУЛЫҚ САҚТАУ МИНИСТРІ "Мұндай жағдайлар бізде, шамамен, бес жыл бұрын болған. Кейін барлық перинаталдық орталық пен перзентханаға бейнебақылау орнаттық, баладан бас тартқан аналармен жұмыс істейтін психологтарды қабылдадық. Осындай мақсатты жұмыстар жүргіздік. Егжей-тегжейін білмеймін, БАҚ мәліметінше, әйел өзі туған баласымен бірге шығарылған, ал бұл жағдайдың барлығы жалдамалы пәтерде болған. Бұл оқиғадан соң елдің түкпір-түкпіріндегі барлық медицина қызметкерлерімен қайтадан жұмыс жүргіземіз "

Министрдің айтуынша, еліміздегі барлық перзентханада бейнебақылау орнатылған. Сонымен қатар, басшылар перзентханада не болып жатқанын бақылайды деп сендірді. Ал Атырауда жаңа туған нәрестенің бетін тіліп хиджама жасаған емшінің әрекеті де қоғамда қызу талқыланды. Әлеуметтік желіде сәбидің маңдайын тіліп, қан шығарып жатқан видео тарады. Онда емшінің хиджама жасап жатқанын көруге болады. Емшінің әрекеті желі қолданушыларының ашуын тудырды. Балаға зақым келді деп жазып жатты. Министр жалпы хиджама жасау емі лицензияланбаған деп отыр.

АЖАР ҒИНИЯТ – ҚР ДЕНСАУЛЫҚ САҚТАУ МИНИСТРІ "Менің айтарым адамдар баламалы медицинамен көп айналысады. Дәстүрлі емес медицинамен айналысатындар лицензия алуы қажет және тек лицензияланған қызмет түрін көрсетуі керек. Бүгінде лицензияланған медициналық көмек түрлеріне хиджама жатпайды. Сондықтан, комитет бұл деректі анықтап жатыр, тексеру жүргізеді. Алдағы уақытта бұл мәселелерді бақылауға аламыз"

Айта кету керек, Атырауда баланың бетін тіліп "емдегені" туралы ақпарат бұған дейін "НеМолчиKZ" қорының парақшасында пайда болды. Қор өкілдерінің айтуынша, емдік шара хиджама орталығында жүргізілген. Баланың маңдайын тіліп ем жасап жатқан емші өзі видеоның астына «Сәби қой аурын қию» деп жазған.