Ақан сері 45/1 мекенжайында тұрып жатқан көпбалалы, мүмкіндігі шектеулі балалар мен оларды тәрбиелеп отырғандар баспаналарын "Бақытты отбасы" бағдарламасымен ипотекаға рәсімдеген. Көптен аңсаған арманымызға қол жеткіздік деп бөркін аспанға атқан қарашаның қуанышы ұзаққа созылмады. Пайдалануға берілгеніне жыл өтпей жатып ақаулар анықталып жатыр. Онсыз да тапқан таянғанын несиеге төлейтін жұрт енді нестерін білмей дал болды.

Бұдан бөлек, кіреберістегі электрқалқаны да қауіпті. Үнемі ашық күйде, есептеуіш құрылғылар дұрыс бекітілмеген.

Мәселеге қанығып, жауап алмаққа құрылысқа жауапты мердігердің кеңсесіне бас сұқтық. Мердігердің айтуынша, кепілдік мерзімі аяқталғанға дейін аталған ақаулар жойылады.

Тұрғын үйдің құрылысы 2022 жылдың қыркүйек айында аяқталыпты. 2023 жылдың желтоқсан айында пайдалануға берілген. Белгілі болғандай, құрылысқа бір мердігер, ал инженерлік желілер мен абаттандыруға басқа мердігер жауапты екен. Әкімдік өкілдерінің айтуынша, тұрғын үйдің бір жылдан астам уақыт бос тұруына инженерлік желілер мен абаттандыруға жауапты мердігер кінәлі.

Жосықсыз мердігердің кесірінен бүтін бір үй тұрғындары зардап шегіп отыр. Алайда құрылыс бөлімі мен мердігер мекеме барлық олқылықтарды түзетеміз деп ант су ішті. Жыл соңына дейін ақаулар жойылмаса, мәселені қайта көтеруге тура келеді.