Орал қалалық мәдениет және демалыс саябағында «Балалар күні» мерекесіне орай байдарка және каноэ есуден ашық біріншілік басталды. Аталған шара қоғамдық-саяси қызметкер Қайыржан Сұлтанұлы Идиятовты еске алуға арналды. 

№1 Мамандандырылған олимпиадалық резервтегі балалар мен жасөспірімдер мектебінің су спорты базасында байдарка және каноэ есуден Орал қаласының ашық біріншілігі басталды. 2004, 2005, 2006 жылы туған жасөспірімдер арасында өткізіліп отырған осы жарысқа Нұрсұлтан, Алматы, Шымкент, Ақтөбе, Атырау және Орал қалаларынан 6 команда қатысты. Соңғы уақытта жастар арасында кеңінен таралып жатқан бұл спорт түріне арналған шара қалалық спорт бөлімінің және "Ақжол" демократиялық партиясының қолдауымен өтті. Біраз жылдары бойы "Ақ жол" партиясы БҚОФ төрағасы қызметін атқарып, өңірдің қоғамдық-саяси өміріне зор үлес қосқан Қайыржан Сұлтанұлы Идиатовты еске алуға арналған шараға облыстық, қалалық, аудандық мәслихат депутаттары және Қайыржан Сұлтанұлының бауырлары қатысып, ескек есушілерге сәттілік тіледі. Жеңімпаздарды марапаттау рәсімі ертең, яғни 2 маусым күні қалалық мәдениет және демалыс саябағында өтеді.

Оралда алғаш рет байдаркамен каноэ есуден республикалық турнир өтуде. Дүбірлі доданың ашылу рәсіміне БҚО әкімінің орынбасары Ғабидолла Оспанқұлов, БҚО спорт басқармасының басшысы Әсия Аманбаева мен спорт және дене шынықтыру комитеті төрағасының орынбасары Асқар Есімов арнайы қатысты. Байдаркамен каноэ есуден федерация кубогы елімізде алғаш рет ұйымдастырылып отыр. Спорттық сайысқа Алматы, Қызылорда, Атырау, Батыс Қазақстан сынды облыстардан 5 команда бақ сынасуда. Ал аталмыш сайыс төрт күнге жалғасып, турнирде үздік танылғандар марапатталған.