Ескендір ағамыздың әндерін сағындыңыз ба? Орал қаласында бастау алған дәстүрлі "Атамекен" ән фестивалінде өнер сүйер көрерменге тамаша әндерге құлақ құрышын қандыруларына болады. Халық әртісі, мемлекеттік сыйлықтың лауреаты, композитор Ескендір Хасанғалиевтің әндерін орындаушылар екі күн бойы өзара жезтаңдайларды анықтайтын болады.

Облыс орталығында дәстүрге айналып үлгерген, жерлесіміз Ескендір Хасанғалиевтың "Атамекен" атты ән фестивалі басталды. Бұл жолғы мәдени шара 30 жас өнерпаздың басын қосты. Ескендір Хасанғалиевтің әндерін орындап, байқауда бақтарын сынаушылар еліміздің әр өңірлерінен келгендер. Ал, бір үміткер осы сынға арнайылап көршілес Өзбекстанның жас таланты. Биылғы байқаудың ерекшелігі көп жылдан бері фестивальда ұмыт болған екі жанр байқауға қайта қосылыпты.

Ескендір Хасанғалиевтің есімін қалың қазақ біледі. Дәл осылай десек артық айтқанымыз болмас. Себебі, еңкейген кәріден, еңбектеген сәбиге дейін оның шығармашылығымен жақсы таныс. Оның туындыларын шырқамайтын жан жоқ. Ал, сазгердің көпшіліктің сүйіктісіне айналған "Атамекен" әні бірнеше ұрпақтың төл туындысына айналғана білді. Келер жылы аталмыш әннің жарыққа шыққанына жарты ғасыр толмақ.

Халықаралық ән фестивалінің шымылдығын алғаш болып, қызылордалық Сабыржан Көлбаев ашты. Сыр елінен келген әнші эстрада жанры бойынша өз кезегінде сазгердің "Асыл арман" атты туысын сахна төріне шығарды.

Ескендір Хасанғалиевтың шығармашылығына арналған ән фестивалі Оралда екі күн әуелейтін болады. Ал, өзгелерден өнерімен оза шапқандардың есімдері ертең белгілі болады.

Ақжайық өлкесінде "Атамекен" халықаралық ән додасы басталды. Биылғы жылы оныншы мәрте ұйымдастырылып отырған ән байқауына 20-дан астам қатысушысы бақ сынап жатыр. Өнерпаздар Ресейдің Астрахан облысы мен еліміздің Астана, Алматы, Қостанай, Атырау Шымкент, Тараз, Петропавл, Шығыс Қазақстан мен Маңғыстау өңірлерінен келген. Қазаққа танымал сазгердің туындылары туған жерді, достықты және махаббатты дәріптейді.

Тума талант иелерін анықтау үшін жиылған әділ-қазылардың құрамын Қазақстан Республикасының халық әртісі, "Отан" орденінің иегері Ескендір Хасанғалиев пен еліміздің еңбек сіңірген қайраткері, әнші сазгер Біржан Хасанғалиев бастап тұр. Оныншы мәрте ұйымдастырылып отырған додада бақ сынап жатқан қатысушылардың дені осал емес. Олар өз өнерлерін ортаға салып, көрермендерге тамаша тартуды көздеп отыр.

Халықаралық ән байқауының қорытындысы бойынша жеңімпаз атанған өнер иелері арнайы алғыс хат, статуэтка мен ақшалай сыйқылықтарға ие болмақ.