Белгілі актер, продюсер және режиссер Нұртас Адамбаев «Я жених» атты жаңа фильміне ән іздеген кезде оралдық Артур Дәулетияров пен Райымбек Бақтыгереевтің «Самая вышка» әніне көзі түскен. Осылайша олармен байланысып, әнге клип түсіруді ұсыныпты. Бүгінде «Самая вышка» әні Адамбаевтың жаңа кинотуындысына саундтрек ретінде таңдалып отыр. Артур мен Райымбек болса, Нұртас Адамбаевтың өзі оларды іздеп, тауып алғанына төбелері көкке жетіп қуанғандарын айтады. Уәде етілген әнбаян да 13 қаңтар күні шығып, бір күннің ішінде ютуб желісінде 30 мыңға тарта көрсетілім жинап үлгерді. Ал жаңа туынды киносүйер көрерменге наурыз айының басында жол тартпақ.