Ең ащысы – сұм соғыс, ең тәттісі – Ұлы Жеңіс демекші бүгінгі соғыс ардагерлерінің ерлігі еш уақытта ұмытылмады. Көбі келместің кемесіне мініп кетсе, біразы жағада тұрған соғыс ардагерлеріне қанша құрмет көрсетілсе де артық болмасы анық. Елорданың туған күнінде шаһардағы бірқатар соғыс және тыл еңбек ардагерлеріне еріктілер атынан сыйлықтар табысталды.
Сарғайса да тарихтың ақ парағы, сол күндер мәңгі есте сақталары анық. Ел алдындағы борыштарын өтеп, еліміздің амандығын, жеріміздің тұтастығын қорғап қалған ардагерлерге тағзым ету біздің қашан да парызымыз. Себебі олар еліміздің жарқын болашағын, жас ұрпақтың өмірін, халықтың бақыты мен қуанышын қызғыштай қорғады. Сондықтан да бүгінгі бейбіт өмір үшін соғыс ардагерлеріне мәңгі қарыздармыз.
Еріктілер қолғабыс болған шараның аясында шағын концерт ұйымдастырылды. Карантин талаптарын сақтай отырып жаздың жайма шуақ күнінде ашық аспан астында рухты әндер айтылып, ардагерлерді бір марқайтып тастады.

Адамзат тарихындағы қанды қырғынның аяқталғанына биыл 75 жыл. Сұм соғыста ерлік пен қайсар рухтың үлгісі болған батырлардың тағылымды ерліктерін дәріптеуді жалғастырамыз. Бүгінгі біздің кейіпкеріміз: Владимир Алексеевич Иванов. Саратов облысының тумасы 1943 жылы майданға аттанады.

Сұм соғысты бастан кешіп, жеңісті жақындатқан ардагерлердің бірі- Владимир Иванов. Бүгінде 94 жасқа келген кейіпкеріміз 1943 жылы Саратов облысынан қан майданға аттанады. 17 жастағы бозбала бірден қысқа мерзімді даярлықтан өтіп, Кеңес Одағының Қиыр шығысын қорғау үшін қолына қару алып, 7 жыл бойы әскерде қызмет жасайды.

Ардагер Ұлы Жеңісті Қиыр Шығыстағы Хабаровск қаласының маңында орналасқан Галенки ауылында қарсылапты. Владимир Алексейевичтың ата-анасы 1946 жылы Оралға қоныс аударады. Жауынгер әскердегі қызметін аяқтағаннан кейін, осы шаһарға табан тірейді. Ардагер соғыстан кейін Локоматив Депосына жұмысқа кіріп, 38 жыл бойы машинист болып қызмет жасайды.

Қан майданнан кейін, ардагер зайыбымен отау құрып, 66 жыл бірге өмір сүрген. Ерлі-зайыптылар 2 бала мен үш немере тәрбиелепті. Бүгінде 1 ғасырға жуық өмір сүріп, сұм соғыста ерлік пен қайсар рухтың арқасында мыңмен алысып, бүгінгі ұрпаққа бейбіт өмір сыйлаған батыр өскелең ұрпақ білім алып, елдің дамуы үшін еңбектенсе деген өсиетін айтады. Кейіпкеріміз секілді мыңдаған батыр жауынгердің ерлігінің арқасында соғысты фильмнен көріп, кітаптан оқыған ұрпақ бейбіт күнде өмір сүріп, батырлар ерлігін үлгі-өнеге тұтады!

Бүгін Орал қаласының ардагерлер кеңесі гүлдер бағын өсіруші 77 жастағы Валентина Шаринаға қонаққа барды. Зейнеткер 35 жылдан бері құртқашаш гүлдерін өсірумен айналысады екен. Ауласында ирис гүлдерінің 230 сұрыпын өсіріп отырған зейнеткердің еңбегі көпшілікті таңқалдырды.

Валентина Шаринаның гүл өсіру сүйікті ісі екен. Бұдан бөлек зейнеткер іс тігетін цехта жұмыс жасайды. 77 жасқа толса да ирис гүлдерін баптауды қиынсынбайды. Керісінше, бар сүйіспеншілігімен гүлдерін мәпелеп, шаршағанын ұмытады. Балаларымен қария Жұлдыз шағын ауданындағы жеке үйде тұрады. Бұрын Валентина Шарина Диана тігін фабрикасын басқарған. Алғашқы рет осындай бақты іс сапарда жүргенде көріп, өзі өсіруге бел байлайды.

35 жылдан бері ирис гүлдерінің құпиясын зерттеп, сұлулығына тамсанған зейнеткер қызылды, жасылды, алуан түсті гүлдерімен қонақтарын таңғалдырады. 20 соты0 алқапты бақта ирис гүлінің 230 сұрыпы өсірілген. Қалалық ардагерлер кеңесінде 10 мың жарымдай қария болса, олардың біразы бүгін Валентина Шаринаның бағында серуендеп, ауладағы асханадан дәм татты.

Ардагерлер кеңесінің мүшелері жастарына қарамастан қоғам үшін маңызды шараларға атсалысуға тырысып келеді. "Рухани жаңғыру" бағдарламасын жүзеге асыруға да олар өз үлестерін қосып бағуда.

Жастар ұйымының белсенділері зейнеткерге көмір кіргізіп, отын жарып, ауласын күртік қардан аршып берді. Облыс орталығында осындай көмекке зәру 200-ден астам жан бар екен. Еріктілер жылдың барлық мезгілінде олардың пайдасына жарауға дайын екендерін мәлімдеді. Белсенділер "Ардагерлерді ардайық" акция аясында тағы да біраз жандарға қолғабыс көрсетуді жоспарлап отыр.

Ардагерлер арасындағы спортакиадаға 150ге тарта қатысушы жұмылдырылмақ.Бүгін динамо шаңғы кешенінде қысқы спорт түрінен жарыс ұйымдастырылуда. Оған қатысуға ниет білдірген ардагерлер серпіні күшті.
Жыл соңына дейін әлі спорттың 10 түрінен сайыстар өтпек. Олардың барлығы да бұқаралық спорт түрлерін дамытуға, ардагерлер әлеуетін көтеруге бағытталып отыр.
Шаңғымен сырғанап шыныққан қариялар лезде мәреге де жетіп жатты. Жастары жетпістен асса да әлі ширақ жандардын осы спортпен айналысып жүргеніне 30-40 жылдан асыпты. Ал спорттық дода соңында үздіктердің үздігі атанғандар марапатталып, жүлделер табысталды.