Облыста ыстық ауа райы әлі де сақталады. Кей аудандарда сынап бағаны 43 градусқа дейін көтерілуі мүмкін. Бұл туралы казгидромет орталығының мамандары мәлімдеді. Осы орайда дәрігерлер жасы егде тартқандарға үйде отыруға кеңес береді.Шілденің шіліңгір ыстығы кім- кімге де қолайлы болмай тұр. Әсіресе нақ осы пандемия мен пневмания дендеген шақта медициналық көмек қажет жандардың саны екі есеге артқан. Осы орайда жандарына сая іздеген жандардың балмұздақ, тоңазытқыштан сусын ішпегені абзал дейді жедел жәрдем қызметкерлері. Өйткені ағзаға бірден түскен суық сусын өкпенің қабынуына әкеп соқтыратын көрінеді.Синоптиктер осы орайда аптап ыстық өңірде әлі де сақталады деп болжайды.Өткен демалыс күнінен бері екі апталық карантиндік шектеулер енгізілді. Жасы 65 тен асқан адамдардың тысқа шығуына шектеулер қойылды. Қолайсыз ауа райында олардың үйде қалғандары дұрыс. Өйткені егде жастағы жандардың жүрегі әлсіз келетіндіктен қан қысымы көтеріліп, жағдайларының нашарлауы бек мүмкін.Сақтансаң сақтармын демекші, бірінші байлық денсаулығымызға баса мән берейік.

Оралдағы аптап ыстықтан жедел жәрдемге хабарласушылар саны күрт артқан. Күніне жедел жәрдем стансасына келіп түскен қоңыраулардың саны мыңға таяған. Оның ішінде күннің ыстығынан қан қысымы көтеріліп, жүрегі ауырған, басынан күн өткен адамдардың саны да өскен. Ал синоптиктер болса, күн райы әлі де ыстық болатынын айтады. Әсіресе, аномальды ауа райынан жас балалар мен ересек адамдар жапа шегуде. «Бұл жерде балалардың жағдайына ерекше мән беру керек. Балалар өздеріне жауап бере алмайды. Сол себептен ересектер қадағалауы тиіс. Басына бас киімдерін кигізіп, көлеңкеде ойнатып күн астында көп жүрмеуін бақылау қажет», - дейді жедел-жәрдем станциясының дәрігерлері. Мәселен, күні кеше 695 шақырту түссе, оның 16-сы көшеде күн тиіп, көмекке зәру болғандар көрінеді. Ауа райын болжаушылардың айтуынша, мұндай ыстық әлі де созылуы ықтимал. Айта кетейік, аптап ыстық табиғатқа да үлкен залалын тигізіп жатыр. БҚО мен Орал қаласында қатты ыстыққа байланысты өрт қауіпінің жоғары деңгейі жарияланды. БҚО ТЖД мамандарының таратқан ақпаратына сүйенсек, демалыс күндері 4 өрт пен 15 жану оқиғасы тіркелген. Ал тұрғындар болса, жоғары ауа температурасынан қайда барып демаларға білмейміз дейді. Қалалық билік тұрғындарды табиғи апаттар туралы ескретпелерге баса назар аударуға шақырады.