Бүгін Ақжайық жеріне табан тіріген ақпарат және коммуникациялар вице-министрі Нұргүл Мауберлинова қалалық әкімдікте өткен жылы қызметін бастаған "Ашық әкімдік" алаңында болып, көрсетілетін қызмет түрлерімен танысты.

Елбасының «100 нақты қадам» атты Ұлт жоспарында көрсетілген транспарентті және есеп беретін мемлекетті қалыптастыру мақсатында қолға алынған ашық әкімдік қызметіне жүгінуші халық саны көбейіп келеді. Мамандардың айтуынша көп жағдайда қызмет алушылар саны түскі уақытқа дейін көп болатын көрінеді. Сұрақтардың басым бөлігі жер қатынастары, сәулет және қала құрылысы бөлімдерінің қызметіне қатысты көрінеді.

Осы кезге дейін ашық әкімдіктің бөлімдері 90 233 қызмет ұсынғанын ескерсек, қызмет көрсетудің осы тәсілі мамандарға түскен жүктемені төмендетіп, тұрғындардың уақытын үнемдеуге мүмкіндік жасаған. Мұны ақпарат және коммуникациялар вице-министрі Нұргүл Мауберлинова «Цифрлық Қазақстан» мемлекеттік бағдарламасының Ақжайық жерінде сәтті жүзеге асып жатқанынымен байланыстырды.

НҰРГҮЛ МАУБЕРЛИНОВА,
АҚПАРАТ ЖӘНЕ КОММУНИКАЦИЯЛАР ВИЦЕ-МИНИСТРІ
Бүгінде тұрғындар  қажетті қызмет түрлеріне электронды қолтаңба алу арқылы үйде отырып ақ қол жеткізе алады. Мәселен, ашық әкімдік жобасы ұсынатын жұмысты да электронды қолтаңба арқылы ала алады. Сондай-ақ, 740 мемлекеттік қызметтің бүгінде 452-сі автоматтандырылған жүйеге көшкен. Яғни,  мемлекеттік қызметтің 80 пайызын электронды жүйе арқылы жүзеге асыруға болады. Мұндай жеңілдікті азаматтардың 85 пайызы қолдап, жоғары бағалап отыр.

Ашық әкімдік жобасы күніне 400-ге жуық тұрғынға ашық, айқын қызмет көрсетуге қауқарлы. Алдағы уақытта аталмыш қызметтің қарқыны тағы да жанданатын болады дейді сала мамандары.