Ақсайдағы жағдай қашан жақсарады? Естеріңізде болса, өткен аптада өңірімізге қарасты Ақсай қаласының қаптаған қоқыстың ордасына айналғанын айтқан болатынбыз. Жаз бойына тазармаған шағын қаланың тұрғындары өздерінің арыз-шағымдарын облыс әкімінің өзіне жазған. Өткен аптаның аяғында өңір әкімі ғали есқалиев аяқтай барып, ақсайлық тұрғындардың жағдайымен танысты.

Ақсай қаласының қоқыстың ордасына айналғанын ақпарат құралдары арқылы ел ішіне тез жайылды. Тұрмыстық қалдықтардың арасында қалған тұрғындар амалсыздан әлеуметтік желі арқылы облыс әкімінен жәрдем сұраған. Ақсайлықтардың жағдайымен аяқтай барып таныспақ болған облыс әкімі Есқалиев Бөрлі ауданына жасаған жұмыс сапары барысында қоқыс шығару мәселесінде неліктен кемшілік кеткенін сұрап, салаға жауапты мамандар мәліметіне құлақ асты. Аудандық атқа мінерлер 1986 жылы іске қосылған полигонның 99 пайызға лық толы екендігін жеткізді. Аумақ қорғалмағандықтан, оның қанша шақырымға шашылып жатқандығын айтуда да қиын. Құжат жүзінде қоқыс аумағы 19 гектарға жайылған және экологиялық талаптарға да сай келмейді. Жаңасын салу үшін бір жылдан бері жобалық -сметалық құжат жасақталып жатыр. Десек те, полигонның қай жерде орналасатындығы белгісіз болғандықтан сараптама берілмей отыр.

Мамандар уәжін тыңдаған облыс әкімі мәселені созбалаңға салмай 1-ші қазанға дейін түбегейлі шешуді тапсырды. Қоқысты жинауға мемлекеттік жекеменшік әріптестік аясында жауапты компанияны тауып, ол 5 жылға дейін жөнді жұмыс жасауы керектігін айтты.

Сондай-ақ, облыс әкімі ауданына жасаған жұмыс сапары барысында мұнай мен газ саласында қызмет жасайтын компания өкілдерімен де жүздесті. Кездесу барысында сөз алған аймақ басшысы шетелдік жұмысшыларды жұмысқа қабылдауға байланысты заңға өзгерістер енгізілгендігін ескертті. Мәселен, 3-ші санаттағы қызметке шетелдік мамандарды шақыртып қабылдауға квота саны азайса, 4-ші санаттағы жұмысқа бұрыңғыдай жолбикелерді тартуға түбегейлі тыйым салынады.

Жәнібек ауданында 218 адам тұрғын үй кезегінде тұр. Аталмыш мәселені шешу үшін аудан көлемінде 12 пәтерлі екі тұрғын үйдің жобалық сметалық құжаттары тиісті сараптамадан өтіп жатыр. Аталмыш нысандар пәтер кезегінде тұрған азаматтарға табысталмақ. Облыс орталығынан шалғай орналасқан аудан тұрғындарын жол мәселесі толғандыратыны мәлім. Аудан мен облысты жалғайтын тас жолдың жөнделуі Елбасының тапсырмасынан соң, оң шешімін тапты.

Бұл- Жәнібек ауданына қарасты Қамысты ауылындағы суландыру жүйесі. Аталмыш жүйенің жалпы ұзындығы 34 шақырымды құрайды. Бірнеше ауылды сумен қамтып отырған бұл жүйенің әбден тозығы жеткендіктен, күрделі жөндеу басталды. Жобаның жалпы құны 82 млн теңгені құрап отыр.

Аудан орталығында сөз алған Жәнібектің әкімі өңірдің жеткен жетістіктерін жіпке тізіп, табыстың мөлшерінің артқандығын тілге тиек етті. Бүгінгі таңда ірі қараның саны 48 мыңнан, қойдың саны 65 мыңнан асып жығылған. Сондай-ақ, ет экспорттау ісі алға басты. Аудан көлемінде 900-дан кәсіпкерлік нысаны бар. Оларда 1000-нан астам тұрғын еңбектенуде.

Жәнібек ауданының хал ақуалымен танысқан облыс әкімі аудан басшысының есебі мен бұқара халықтың пікірі мұқият тыңдап, биылғы жылдың алты айында атқарған жұмыстарын жіпке тізіп, тиісті тапсырмаларды жүктеді. Сондай-ақ, Жәнібек өңіріне жасаған жұмыс сапары барысында Ғали Нәжмиденұлы күрделі мәселелермен келген тұрғындармен жүздесіп, жеке қабылдау ұйымдастырды.