Орал қаласында 8-ші желтоқсанда рұқсат етілген бейбіт митинг өтті. Митинг Ремзовод ауданында орналасқан "Черноболь" паркінде ұйымдастырылған еді. Азаматтар бағаның қымбаттап бара жатқандығына, жең ұшынан жалғасқан жемқорлықтың таралып жатқандығына байланысты пікірлерін ортаға салды.

Енді тұрғындардың уәжіне кеңінен тоқталсақ. Бірінші кезекте тұрғындар қымбатшылық мәселесін көтерді. Митингте сөз алған жандар көгілдір отынның бағасын көрші облыстарымен салыстырып, облыста газдың бағасы қымбат екендігін жеткізді. Мәселен, Ақтау, Ақтөбе мен Атырау облыстарында газдың 1 куб метріне арналған бағасы 8 теңгеден аспайтын болса, ал, батысқазақстандықтар көгілдір отынның бір куб шаршы метрі үшін 17 теңгедей қаражат төлейді.

Бейбіт митингке жиналған азаматтар сыбайлас жемқорлыққа байланысты алаңдаушылықтарын да жеткізді. Олар Грузияны мысалға келтіріп, жең ұшынан жалғасқан жемқорлыққа төтеп беру керектігін еске салды.

Бейбіт митингке шыққан азаматтар қолдарындағы жазбаларында "Қымбатшылыққа қашанғы жол береміз", "Стоп коррупция" мен "Полиция өз функциясын орындасын" деген тілектерін оқуға болады. Жақында полиция қызметкерлерімен соттасқан Айболат Бөкенов құқық қорғау органдарының салғыртығын сынға алып, өз ойын жеткізді.

Митингке сөз алған нәзік жандылар ана мен бала құқығын қорғайтын арнайы заң керек,- дейді. Олар биыл тағайындалған атаулы әлеуметтік көмектің "жырын да" еске алып, табысы артқан жанұялардың жәрдемақыны кері мемлекетке қайтарып жатқандығын да айтып өтті.

Орал қаласында бейбіт митинг 2012 жылдан кейін, жеті жылдан соң өтті.

Орал қаласында республикалық "Қазіргі заман қаһарманы" атты республикалық акция өз жұмысын бастады. Аталмыш акция барысында бүгінгі күні қоғам тыныштығын қорғап, бейбіт күнде жан тапсырған қызметкерлердің ерлігін насихаттау.

Қоғам тыныштығын күзетіп, қылмыскерлерді ұстап, заң алдында жауап беру үшін жұмыстанып жүрген- полиция қызметкерлерінің еңбегі ерен. Еліміз егемендік алған 27 жылдың ішінде 780 ішкі істер министрлігінің қызметкері қылмыскерлерді құрықтау барысында жан тапсырған, сондай-ақ, 2300-ден астам маман қоғам тыныштығын күзету барысында жарақаттаныпты. Облыс орталығында ұйымдастырылып отырған шараның негізгі мақсаты: өскелең ұрпаққа азаматтардың өмірін ажалдан арашалап, қылмыскерлермен күресіп жүрген бүгінгі күннің батырларын насихаттау, олардың еңбегі жайлы айтып, түсіндіру.
Ақ жайық өлкесінде ұйымдастырылған республикалық акцияға арнайы келген құқық қорғаушылардың бірі -Дәуренбек Шоқпытов. Аталмыш азамат өткен жылы мұз құрсауында қалған қала тұрғынын құтқарыпты.
Акция аясында бүгінгі күннің батырлары мектеп оқушыларымен кездесіп, өскелең ұрпақпен пікір алмаспақ.

Облыс аумағындағы жағалаулардан бір ай ішінде 24 мың тонна күл-қоқыс жиналды. Бүгінде тіпті қала орталығындағы жағалаулардың өзі жиналған қоқыстың салдарынан адам танысмастай күйге түскен. Қоршаған ортаның бұл жағдайына бейжай қарамайтын мыңдаған ерікті көпке үлгі болып, осы шараға белсене үлес қосты. «Таза жағалау» акциясы биыл да жыл сайынғы дәстүрден жаңылмай мамыр айында қолға алынды. Ауқымды тазалық акциясына мемлекеттік мекемелердің қызметкерлері мен еріктілер ұйымшылдықпен атсалысып, белсенді жұмыс істеді. Енді олар бұқара халықты да табиғат тазалығына бейжай қарамай, бірігіп, белсене атсалысуға шақырады. Өкінішке орай, жиналған қоқыстың көп бөлігі пластикалық бөтелкелер мен шыны ыдыстардан тұрды. Бұл дегеніміз, жазда демалуға келген тұрғындардың салақтығын, табиғат-ананы аяламайтындарын көрсетеді. Егер демалушылар қоршаған ортаның тазалығын ойлайтын болса, осыншама қоқыс болмас еді, деп қынжылады ұйымдастырушылар.

Орал қаласында "Ғасырлар тоғысында" атты акция басталды. Аталмыш шараға қалалық білім беру нысандарының 150-ге жуық оқушысы қатысып жатыр. Акцияның негізгі мақсаты -  қоғамдық көліктерде ұлы ғұлама ғалымдардың афоризмдерін іліп, барша қала тұрғындарына ой салу.

Шаһарымызда игі бастама қолға алынды. Мектеп оқушылары ұлы тұлғалардың ой-пікірлерін ұлықтау мақсатында облыс орталығына қатынайтын қоғамдық көліктерге қанатты сөздер, афоризмдерді ілді. Аталмыш шара Елбасының "Болашаққа бағдар-рухани жаңғыру" мақаласының аясында жүзеге асуда.

"Ғасырлар тоғысында" акциясына шаһарымыздың барлық мектептері жұмылдырылған. Қоғамдық көліктерде ғұламалардың афрозимдерін ілу шарасына 150-ге жуық оқушы қатысқан.

Ұлы ғұлама ғалымдардың пікірлерін бұқара халыққа насихаттауды көздейтін жоба келешекте де өз жалғасын таппақ.

Ринат Рахметов -5 баласын жалғыз тәрбиелеп отырған жалғызбасты әке. Айына табатын нәпақасына балаларын асырап отырған оның тұратын баспанасы да жоқ. Қазір тұрып жатқан үй-жайының сиқы осы. Қамқөңіл әкеге бұл үйді жұмыс орнынан тегін берген. Соған да шүкір дейді. Үйдің үлкені бүгінде 20 жасқа келсе, кішісі небәрі бір жаста ғана. Бауыр еті баласын аяғынан тік тұрғызу үшін тырбана еңбек етіп жүрген ол 5 балаға өзі ана, өзі әке.
Осындай қамкөңіл жандарға қамқорлық таныту акциясын Орал қалалық ішкі істер басқармасының қызметкерлері бастап кетті. Қаңтардың онында басталған «Қамқорлық» атты шара барысында аз қамтылған отбасыларға көмек қолы созылып, тәртіп сақшылары арнай қаржы жинап, материалдық көмек көрсетілуде.
Айта кетелік, «Қамқорлық» акциясы ақпанның 10на дейін жалғасын таппақ

Облысымызда 220 су айдыны бар екен. Мұндағы балықтар тұншығып қалмау үшiн жыл сайын өзен-көлдерде жүздеген ойық ойылады. Эколог мамандар мұзды ойып, оларға қап-қап сабан-қамыс салып кетедi. Бұл өз кезегінде, ойықтың қатып қалмауына және ауаны өткiзуге мүмкiндiк бередi екен. Табиғат жанашырларының айтуынша, жерге жарты метрге жуық қар түссе, өзен-көлдерде 70-80 сантиметр мұз қатады. Қазір өзендегі мұздың қалыңдығы 50 сантиментр, қар жамылғысы шамамен 5-7 сантиметр. Сала мамандарының айтуынша, бұндай жағдайда су астында оттегі жеткіліксіз болады екен. Өңірдегі балық шаруашылығымен айналысатын мекеме өкілдері көктем, жаз-күз айларында тынбастан балық ауласа, ал қыстың күндері үкі ойып, балықтардың өмір сүруіне қолайлы жағдай жасайды. Егер су түбіндегі жәндіктерге оттегі дер кезінде жіберілмесе, онда жаппай қырылып қалуы мүмкін. Облыстағы 148 су айдынындағы балықтардың қырылу қаупі бар. Ал олар үшін ең қолайсыз маусым қаңтар ақпан айы. Айта кетелік, бұндай игі шаралар өңіріміздің барлық аймақтарында жалғасын табуда. Бұдан бөлек 27 қаңтар күні де барлық өзен-көлдерде ойық ою акциясы өтпек.