"Атадан мал қалғанша, тал қалсын"-деген ғибратты сөзді ұстанған оралдық ата-аналар мектеп аулаларына тал егіп, ағаш отырғызуда. Игі дәстүр №50 мектепте өз жалғасын тапты. Оқуда озат, мектептің қоғамдық өміріне араласып, тәртібі өзге өрендерге үлгі болатын оқушылар ата-аналарымен бірге сауапты іске атсалысты.

Қала мектептері облыс орталығын күл-қоқыстан тазартып, жаңадан тал-теректердің санын арттыруға белсене атсалысып келеді. №50 мектепте "Жас ұлан" ұйымына мүше оқушылар және олардың ата-аналары педагогтермен бірлесе білім беру ұйымының ауласына тал екті.

Мектеп ауласына баласымен бірге көшет отырғызған ата-аналар бұл үрдісті келешекте жалғастыратынын айтады.

Табиғатты қорғаушылар флора мен фаунаны көздің қарашығындай сақтауға шақырады.

Мектеп әкімшілігі болса жаңадан отырғызылған тал-теректерді күтіп, баптаймыз,- дейді. Естеріңізге сала кетейік, Орал қаласында санитарлық тазалық жұмыстары жалғасуда. Аталмыш іс-шара барысында шаһар билігі қала мен облыс орталығына қарасты барлық мектеп пен мектепке дейінгі мекемелер 7000 түп ағаш отырғызады деп мәлімдеді. Күні бүгінге дейін ата-аналар мен демеушілердің есебінен 2000-нан астам ағаш отырғызылған.

Сурет https://www.opiq.kz/ сайтынан жүктелді

Орал қаласы пробация қызметінің есебінде тұрған жандар мәдениет және демалыс саябағында ағаш отырғызды. Істі болған жиырмадан астам жан президенттің тапсырмасын орындауда.

Оралда сотталғандар қалалық мәдениет және демалыс саябағында бір топ үйеңкі ағаштарын отырғызды. Канадалық үйеңкі жақсы күтім болса, 1 ғасырға жуық өсуі мүмкін. Шараның мақсаты-істі болған жандардың бос уақытын тиімді ұйымдастыру.

Жалпы Орал қаласында шаһар басшысының қаулысына сәйкес, екі айлық санитарлық сенбілік ұйымдастырылады. Күні бүгінге дейін мемлекеттік мекемелер, волонтерлар мен тұрғындар тонналаған қоқыс жинап, сенбілікке қатысты.

Санитарлық сенбіліктің екінші айында облыс орталығында ағаш отырғызу басталмақ. Мамандарының хабарлауы бойынша, қалада мыңдаған тал-терек отырғызу жоспарланыпты. Мөңкеұлы мен Гагарин сынды үлкен көшелерге басымдылық беріліп, қаланың іргесінде орналасқан кенттерде де тиісті жұмыстар атқарылмақ.

Қазіргі таңда шаһарымызды абаттандыру мақсатында 26 мың шаршы метрге гүлдің 24 түрі егіліп жатыр. Облыс орталығы мен аудандарда екі айдан бері ұйымдастырылып келе жатқан сенбіліктердің арқасында мыңдаған тонна күл қоқыс жиналып, түрлі тазалық акциялары болып өтті. Биылғы жылы шаһарымыздың көркін келтіріп, жасыл желектің санын арттыру мақсатында 10 мың түп ағаш көшеттері отырғызылмақ.