Оқиға Орал қаласының Еуразия даңғылы бойында 8-шілде күні кешкі сағат 10-дар шамасында тіркелген. Қазіргі кезде зардап шегушілер облыстық ауруханада ем қабылдап жатыр. Бірінің аяғы сынған, екіншісінің бас-миы шайқалған. Бұл жөнінде денсаулық сақтау басқармасы мәлімдеді. Бұл жағдайдан соң қорқып қалған тұрғындар үнемі осы жерде жол апаты тіркелетінін айтып, қауіпті жолға бағдаршам орнатуды сұрап отыр.

Бұл кітапхана аялдамасы маңындағы жаяу жүргінші жолағы. Осы маңдағы тұрғындар бүгінде жолды кесіп өтуге қорқатын болдық дейді. Жүргізушілер жылдамдықты шамадан тыс асырып, жол ережесін ескермейтін көрінеді. 8ші шілде күні кешкі уақытта екі адамды қағып кеткен жүргізуші олардың денсаулығына айтарлықтай залал келтірген. Мұндай жағдайлар қайталанбас үшін "Қауіпті жаяу жүргінші жолағына" тұрғындар бағдаршам орнатуды сұрайды. Тіпті рұқсат етілген орында ережені сақтап жүрген күннің өзінде әр адам өз өмірінің қауіпсіздігіне көз жеткізіп барып, жолдан өткені абзал екенін еске саламыз.

Орал қаласында тәртіп сақшылары 10 жасар қыз баланы жол бойында қағып өткен жүргізушіні қолға түсірді. Жас жігіт оқиға орнынан қашып кетіп, авто көлігін қала сыртына жасырғаны анықталды.

Қазір адам қаққан жүргізуші қолға түскен. Ол өзінің кінәсін мойындап отыр. Көзді ашып-жұмғанша аяқ астынан тіркелген оқиғадан қатты қорыққан жас жігіт лезде ізін жасырып, қалалық тұрмыстық қалдықтар аймағына көлігін апарып тастаған екен. Полиция қызметкерлері кішкентай қызды қаққан көлікті күдіктімен бірге іздеуге шықты. Сұр түсті Лада приора маркілі темір тұлпарды ұзақ іздеуге тура келді. Өйткені жүргізуші бағыт-бағдарды анықтап, таба алмады.

22 жасар жас жүргізуші осы жағдайдан соң достарына хабар берген екен. Өзі Зеленов ауданының Бударин ауылының тумасы. Дәрігерлердің айтуынша, зардап шеккен қыз бала ашық бас сүйек жарақатын алған. Жағдайы бүгінде өте ауыр көрінеді. Соған қарамастан баланы отаға дайындап жатыр.