Биыл облыста 8 млрд теңге қаражатқа 6 мектептің құрылысы жүргізілуде. Оған қоса мемлекеттік бағдарламалар аясында 4,5 млрд теңгеге Орал қаласы мен аудандарда 33 білім беру нысаны күрделі жөнделуде. Мектеп мәселесін шешу үшін жеке инвесторлар тартылып, биыл екі мектептің құрылысы басталады. Бұл туралы AQJAIYQ Әлеуметтік-Кәсіпкерлік Корпорациясының төрағасы Надир Курумбаев мәлімдеді.Осылайша мемлекеттік-жекеменшік серіктестік аясында бой көтеретін әлеуметтік нысандар саны артатын болады. Яғни мемлекет инвесторларға бар жағдайды жасайды. Инвесторлар өз қаражаты есебінен мектепке сұраныс бар аудандарда құрылысты қолға алады. Ал кәсіпкер шығыны кезең-кезеңімен 10 жыл уақытқа дейінгі аралықта қайтарылады. Осы орайда биыл қалада 900 орындық №51 орта мектеп ғимараты пайдалануға беріледі. Тағы екі мектептің құрылысы басталады. «Каз-Холл» ЖШС, Орал қаласының №31 мектебінің орнына су жаңа білім ошағын салса, «Нуркапстрой» ЖШС, Орал қаласының №52 мектебінің құрылысын Зашағанда бастайды деп жоспарланып отыр.
Халықтың өсуіне байланысты қалада әлеуметтік нысандарға жүктеме артып келеді. 8 мектеп қазір үш ауысымда оқытады. Үш ауысымды оқытумен байланысты мәселені шешу үшін жыл сайын кемінде 3 немесе одан да көп мектеп салып отыру қажет. Жалпы, шаһардағы оқушы орнының тапшылығы 2281 орынды құрайды.Жаңа ғимарат салу есебінен апаттық жағдайдағы екі мектептің мәселесі биыл шешімін табады. Қалған апатты мектептер жағдайын 2021-2022 жылдары шешу жоспарлануда.

Биыл облыс бойынша 5 білім ошағы бой көтереді. Бұл туралы бүгін ҚР Парламент сенатының депутаттарына облыстық құрылыс басқармасының басшысы Алтынбек Қайсағалиев мәлімдеді. Мәселен салынғанына 100 жылға жақын уақыт болған Ет комбинаты ауданындағы №33 жббом-нің орнынан 300 орындық су жаңа мектеп қайта салынбақ. 2018-2019 оқу жылының басында облыста 5 апаттық жағдайдағы мектеп жұмыс жасады. Олар – Орал қаласы бойынша  №31, 33 орта мектептер, Ақжайық ауданы Абай атындағы гимназиясы және М.Өтемісов атындағы орта мектеп,  Қазталов ауданы А. Оразбаева атындағы орта мектеп. Мектептердің апаттылығын жою мақсатында 2 мектептің құрылысына жобалау-сметалық құжаттамалары әзірленген.  Яғни биыл Қазталов ауданы Қазталов ауылында 600 орындық А.Оразбаева атындағы орта мектеп, Ақжайық ауданы Чапаев ауылында 300 орындық мектептің құрылысы басталады. Бұл жұмыстарға  5,3 млрд. теңге қарастырылған. 2018-2019 оқу жылының басында 5 үш ауысымды мектеп анықталса, 2018 жылдың 4 тоқсанында Зашаған кенті Сарытау шағынауданында 900 орындық №50 мектеп пайдалануға беріліп, үш ауысымды мектептер саны 1 бірлікке азайған. Қазіргі таңда, Орал қаласының аумағында орналасқан 4 мектеп үш ауысымда жұмыс жасауда. Ал №33 ЖББОМ білім алушылары қазіргі уақытта осы аудандағы 2-ші мектепте уақытша оқуларын жалғастыруда. Биыл  Орал қаласы Зашаған кентінде №51, ал келер жылы №52 мектептің құрылысын бастау жоспарлануда. Осылайша, үш ауысымдағы мектептер мәселесін шешу жұмыстары өңірде түбегейлі шешілмек.