Оралда екі бірдей қымбат шетелдік көлікті айдап кетіп, металл қабылдау орынана тапсырған 23 жасар қарақшы тәртіп сақшыларының қолына түсті. Таңқаларлық тосын оқиға осыдан бірер күн бұрын болған. «Toyota Runner» және «Mercedes Benz - 124» маркалы темір тұлпарларды арнайы көліктің көмегімен көтеріп алып кетіп, кейін аз ғана тиын тебенге тапсырған. Айыпты бұған дейін де бірнеше мәрте тәртіп бұзып сотталғаны анықталған. Бір қызығы көшедегі көліктерінен көз жазып қалған жәбірленушілердің екеуі де әйел адам болып отыр. Қазіргі уақытта аталған факті бойынша Қылмыстық кодекстің 188- бабының 3 тармағына сәйкес сотқа дейінгі тергеу амалдары жүргізілуде.