Тәуелсіздік алу жолында талай боздақ қаза тапты. Азаттық мыңның қанымен келгені аян. Ел үшін, жер үшін арпаласқандардың қатарында- Жалпақтал ауылында құрылған "Қазақ халқын қорғаушы ұйымы" бар. Жиырмасыншы ғасырдың қанды қырғыны Ұлы Отан соғысы басталған тұста Ғұбайдолла Әнесов бастаған 14 жас қазақ халқын қорғау үшін қолына қару алды. Осы боздақтардың ерлігі мен табандылығын насихаттау үшін Махамбет Өтемісов атындағы Батыс Қазақстан университетінде арнайы кездесу ұйымдастырылды.

Махамбет Өтемісов атындағы Батыс Қазақстан университетінде 1941 жылы құпия ұйым құрып, ел үшін күрескен боздақтардың ерлігін насихаттау мақсатында дөңгелек үстел өтті. Тарихшылар бас қосқан шарада 17 жасар Ғұбайдолла Әнесов бастаған жастардың батылдығы мен ерлігі сөз болды.

Студенттер құпия ұйымның жұмысын, оның мүшелері туралы дайындаған материалдарын ортаға салып, білімдерімен бөлісті. Кеңес үкіметі "қазақ халқын қорғаушы ұйымы" туралы ақпаратты құпия ұстады. Тек тәуелсіздік алғаннан кейін боздақтар туралы ақпарды алғаш рет 1995 жылы "Орал өңірі" газетінде ақын, журналист Амангелді Шахин жазады. Қазақстан жазушылар одағының мүшесі студенттердің баяндамасы мен олардың еңбегін атап өтті.

Естеріңізге сала кетейік, өткен ғасырдың 41 жылы Жалпақталда құпия ұйым құрған 14 боздақтың көшбасшысы Ғұбайдолла Әнесов 17 жасында қамауға алынып, 19 жасында ату жазасына кесілді. Ал осы ұйымға мүше болған жастар 10,8 және 5 жылға сотталды. Боздақтардың тек үшеуі ғана елге аман-есен оралған. Бүгінгі тәуелсіз елдің ұландарына елдің азаттығы жолында жан берген боздақтардың ерлігі мен есімін насихаттау парыз!