Орал қаласында орналасқан №12 мектептің түлектері соңғы қоңырауда әуеге шар ұшырудың орнына қайырымдылық жасау туралы шешім қабылдады. Олар шарға жұмсалуы тиіс қаражатты сырқатқа шалдыққан адамның еміне аударды. Биыл №12-ші мектептен 41 түлек түлеп ұшпақ.

Бұл-қалаға қарасты Деркөл кентінде орналасқан №12-ші мектеп. Бүгінде осы білім беру мекемесінде 1173 оқушы тәлім алады. Биыл осы мектепті 41 оқушы тәмамдамақ. Аталмыш оқу ордасында тұңғыш рет мектеп түлектері салтанатты соңғы қоңырауда әуеге шар ұшыру рәсімінің орнына қайырымдылықты таңдады. Олар шардан келетін пайда жоқ. Ақшаны желге ұшырғанша, пайдалы іс жасауға шешім қабылдадық,-дейді.

Педагогтер оқушылардың игі бастамасын қолдапты. Олар жақында экологиялық жарысқа қатысып, жүлделі орын алғандарын айтады. Ұстаздар қауымы бұл жаңа бастама қоршаған ортаны ластамай, экологиялық мәдениетті қалыптастыруға көмектеседі деп сенім артып отыр.

Естеріңізге сала кетейік, бүгінгі таңда облыс орталығында 50 мектеп бар. Олардың қабырғасында 55250 оқушы білім алады. Биыл 2104 оқушы мектеп түлегі атанбақ.

«Қазақ тілі әліпбиін латын графикасына 2025 жылға дейін кезең-кезеңімен көшіру» жөніндегі іс-шаралар «Ақжайық» өңірінде сәтті жүзеге асуда. Талдауларға сүйенер болсақ, еліміз бойынша облыста орындалған жұмыстар алдыңғы үштікке енген. Сонымен қатар облыстық ономастика комиссиясының жұмысының нәтижесінде 1 ауылдық округ, 6 елді мекен, 200 көше атауларын өзгертуге оң қорытынды берілген. Оның ішінде 12 білім ошағының атауы қазақыланыпты. Мемлекеттік бағдарламаның «Мемлекеттік тілді меңгеру» бағытына қол жеткізу мақсатында басқарма тарапынан жыл сайын облыс тұрғындарына мемлекеттік тілді оқыту курстары ұйымдастырылады. 2019 жылы 1060 адам қамтылып, сертификаттарға ие болды. Биыл да 1070 адамды қамту жоспарланып, курсты ұйымдастыру жұмыстары жүргізілуде.