Қазақстанда 2026 жылдың басынан бері желшешек жұқтырған 20 683 жағдай тіркелді. Дегенмен, бұл өткен жылдың сәйкес кезеңімен салыстырғанда 32,4 пайызға аз. Санитариялық-эпидемиологиялық бақылау комитетінің мәліметінше, науқастардың 83,5 пайызы - 14 жасқа дейінгі балалар. Мамандардың айтуынша, желшешек ауа-тамшы жолы арқылы таралады. Ауру дене қызуының көтерілуі және қышумен қатар жүретін көпіршікті бөртпенің пайда болуымен сипатталады. Көп жағдайда жеңіл өткенімен, кейде ауыр асқынуларға әкелуі мүмкін. Әсіресе ересектер, жүкті әйелдер және иммунитеті әлсіреген адамдар үшін аурудың ауыр өту қаупі жоғары.

Қазақстанда Республика күніне орай «RepublicDay» және «BerekeFest» акциялары басталды. 17 қазанда басталған науқан 27 қазанға дейін жалғасын таппақ. Тұтынушылар құқығын қорғау департаментінің мәліметінше, акция аясында азық-түлік пен өзге де тауарларды жеңілдікпен алуға болады. Ең көп жеңілдік 21-27 қазан аралығында ұсынылады. Бұл күндері дүкендерде арнайы бағалар мен мерекелік сауда ұйымдастырылып, отандық өнімдерге басымдық беріледі.

Қазақстан теміржолы 1500-ден астам жолаушылар вагонын Starlink спутниктік интернетімен жабдықтап жатыр. Жоба 51 бағытты қамтиды. Жаңа жүйе жыл сайын 11 миллионнан астам жолаушыға интернет пен цифрлық қызметтерді пайдалануға мүмкіндік бермек. Жолаушыларға мессенджерлерде мәтіндік хабарлама алмасуға арналған тегін интернет ұсыну жоспарлануда. Ал фото, видео жіберу және басқа да қызметтерді пайдалану үшін ақылы пакеттер қарастырылмақ. Сонымен қатар, жолаушыларға арналған SuperApp мобильді қосымшасы әзірленіп жатыр. Оның көмегімен бағыттарды іздеуге, пойыз кестесін тексеруге, орын таңдауға және билет сатып алуға болады. Сапар кезінде де қосымша қызметтерді пайдаланып, қажетті ақпарат алуға мүмкіндік туады. Жоба теміржол саласындағы цифрлық қызметтерді дамытуға және жолаушыларға сапар барысында қолайлы жағдай жасауға бағытталған.

Оралда реновация бағдарламасы аясында 2027-2029 жылдары сүрілуі мүмкін тұрғын үйлердің мекенжайлары жарияланды. Жоспарға сәйкес, 2027 жылы Ақотау көшесіндегі 14 және 16-үйлер, ал 2028 жылы Пугачев көшесіндегі 28 және Ғ. Тоқай көшесіндегі 27-үй жаңартуға енгізілген. 2029 жылы Х. Чурин көшесіндегі 99-үй, Қ. Аманжолов көшесіндегі 99-үй және Ақотау көшесіндегі 23-үйді жаңарту жоспарланған. Сондай-ақ 2027 жылы Тасқала ауылындағы Сабыров көшесінің 2-үйі мен Игілік көшесінің 9-үйі тізімге енген. Ескі ғимараттардың орнына жаңа тұрғын үйлер салу жоспарлануда.

23-27 қазан аралығында қазақстандықтар жер кадастры мен жылжымайтын мүлікті тіркеуге қатысты бірқатар мемлекеттік қызметке өтініш бере алмайды. «Азаматтарға арналған үкімет» мемлекеттік корпорациясының мәліметінше, шектеу Бірыңғай жылжымайтын мүлік кадастрын жаңа мемлекеттік координаттар жүйесіне көшіруге байланысты енгізіледі. Техникалық жұмыстар 23 қазан сағат 19:00-де басталып, 27 қазан түнгі 00:00-ге дейін жалғасады. Осы кезеңде жер кадастры, жылжымайтын мүлікке құқықтарды тіркеу және техникалық тексеру қызметтеріне өтініш қабылдау уақытша тоқтайды. Ал жылжымайтын мүлікке құқықтарды тіркеуге қатысты электронды анықтамаларды цифрлық сервистер арқылы алуға болады.

Ақтауда Өзбекстан азаматына қатысты әйелді ұрып-соғу дерегі бойынша сотқа дейінгі тергеу басталды. Жәбірленушінің анасының айтуынша, қызы шамамен он жыл бойы бірге тұрған ер адамның зорлық-зомбылығына ұшыраған. Әйелдің сөзінше, ер адам қызын үнемі ұрып, құжаттарын тартып алған және туыстарымен араласуына тыйым салған. Соңғы оқиғадан кейін жәбірленушінің алдыңғы төрт тісі сынып, басы жарақаттанған. Дәрігерлер миы шайқалғанын да тіркеген. Маңғыстау облыстық полиция департаментінің мәліметінше, оқиғаға қатысқан ер мен әйелдің жеке басын куәландыратын және Қазақстанда заңды жүргенін растайтын құжаттары болмаған. Ер адам көші-қон заңнамасына сәйкес қабылдап-тарату орнына орналастырылған. Қазір тергеу жалғасып жатыр. Құқық қорғау органдары оқиғаның барлық мән-жайын анықтауда.

Қазақстан Халық Кеңесінің мүшесі Мұрат Мұқаев Өңірлік даму және жергілікті өзін-өзі басқару комитетінің Экология жөніндегі комиссиясының отырысына қатысты. Жиында Батыс Қазақстан облысындағы экологиялық мәселелер мен ауылдарды дамытуға бағытталған бастамалар талқыланды. Атап айтқанда, «Қаладан ауылға» пилоттық жобасын республикалық деңгейде енгізу, Орал қаласындағы қатты тұрмыстық қалдықтар полигонының мәселесі және киік популяциясын сақтау жайы сөз болды. Сондай-ақ Бөкейорда ауданындағы Хан Ордасы ауылының қылқан жапырақты екпелерін қорғау және «Жайық орманы» резерватын құру бастамаларын алдағы жұмыс жоспарына енгізу көзделіп отыр.

Қазақстан шекарашылары «Қорғас» халықаралық шекара маңы ынтымақтастығы орталығында Қытайға заңсыз жолмен киік мүйіздерін алып өтпек болған әрекетті тоқтатты. Ұлттық қауіпсіздік комитетінің мәліметінше, 20 қазанда 620 киік мүйізі тәркіленген. Қара нарықтағы олардың құны шамамен 180 миллион теңгеге бағаланады. Аталған дерек бойынша материалдар процессуалдық шешім қабылдау үшін құзырлы органға жолданады. Тергеу мүддесіне байланысты өзге ақпарат жарияланбайды.

Қазақстанда мерзімді әскери қызмет екі кезеңге бөлінуі мүмкін. Алғашқы алты айда сарбаздар оқу орталықтарында дайындықтан өтсе, келесі алты айда әскери бөлімдерде қызмет етеді. Бұл өзгерістер Президенттің қатысуымен Қауіпсіздік кеңесі мақұлдаған әскери реформалар жоспарына енгізілген. Реформа аясында Ұшқышсыз жүйелер күштерін құру, әскери қызметшілердің құқықтарын қорғауды күшейту және жарғылық тәртіпті бұзу фактілерімен күресу көзделген. Ұйымдастырушылық өзгерістерді 2026 жылдың соңына дейін аяқтау, ал негізгі реформаларды 2027 жылы жүзеге асыру жоспарланып отыр.

Мектеп мерейтойы - өткенге тағзым етіп, бүгінгі жетістіктерді ұлықтайтын ерекше кезең. Биыл Хиуаз Доспанова атындағы №30 мектеп-гимназиясының құрылғанына 25 жыл толып отыр. Осыған орай білім ордасында «25 жыл - 25 түлек» атты мерейтойлық жоба аясында қала мектептері арасында дәстүрлі садақ атудан турнир ұйымдастырылды. Спорттық шара мектеп түлегі, халықаралық додада ел намысын қорғаған Асемгүл Ғалымжанованың құрметіне арналды.