Орал қаласында үздік студенттер марапатталды. "Атамекен" өнер ордасында "ORAL JASTARY-2024" фестивалі өтті. Университет пен арнаулы оқу орындарында оқитын студент жастар түрлі сайыста бақ сынап, үздіктерді анықтаған еді.

1 жұма бойы оралдық студенттер кіл мықтыдан, кім мықтыны анықтады. Студент жастар қатысқан фестиваль тартысты өтті. Шаһарымызда он аталым бойынша түрлі сайыс ұйымдастырылды. Жалпы фестиваль 7000 астам жастың басын қосты.

"Орал жастары-2024" фестивалі барысында тұңғыш рет жұмысшы мамандықтарда оқитын студенттердің "Мамандығым-мақтанышым" атты көрмесі ұйымдастырылды. Биыл ұйымдастырушылар волонтерлікке екпін салыпты.

Жастар фестиваліне қатысқысы келетін студенттердің саны артқан. Тіпті, кейбір оқу орындары екі немесе одан да көп команда жасақтауды сұрапты. Фестивальдің талабы бойынша бір оқу орнынан бір команда ойнайды. Жастарды спортқа баулу, түрлі зияткерлік қырын дамытуды көздейтін игі шара келешекте өз жалғасын таппақ.

Оралдық спортшылар Астана төрінде ұйымдастырылған әлем чемпионатынан олжалы оралды. Елордада қазанның 7-сі мен 12-і аралығында грэпплингтен әлем чемпионаты өтті. Тартысты жарысқа 31 елден спортшы қатысты. Байрақты бәсекеде батысқазақстандық спортшылар өнер көрсетіп, жеңіс тұғырынан көрінді. Жарыста Алмас Ихсано, Серік Қартабаев, Асхат Шандозтегі мен Қайнар Жеңісов үздіктердің қатарынан табылды. Ал ардагер спортшылардың арасында белдескен Батырбек Ихсатов әлем чемпионы атанды.

Оралдық спортшылар грэпплингтен әлем чемпионатына қатысып, жеңіс тұғырынан көрінді. 5 күн бойы елорда төрінде ұйымдастырылған сайыста батысқазақстандық спортшылар ел намысын қорғап, үздіктер қатарынан табылды.

Батырбек Ихсатов, үш дүркін әлем чемпионы:

-Ардагерлерден алтауымыз бардық. Соның бәрі де жүлделі орын алып келді.Қартабев Серік 3 орын алды. Сосын Ихсанов Алмас 2 орын алды.
+Қарсыластарым Аллаға шүкір бәрі де жақсы болды. Екі видтан күресіп, 4 схатка істеп келе жатырмын,-дейді.

Ақжайықтың спортшылары чемпионатта емін-еркін өнер көрсетіп, байрақты бәсекеге қатысып, спортшыларымыздың жеңіс тұғырынан көрінуі үшін белгілі кәсіпкер Серік Мерғалиев көмек қолын созды. Жеңімпаздар атымтай жомарт жанның қамқорлығына ризашылықтарын білдірді.

Батырбек Ихсатов, үш дүркін әлем чемпионы:

-Демеушілік көрсеткен біздің Серік ағамызға, Мерғалиев Серік Роллановичке алғысымды айтқым келеді. Жарысқа баруымызға себепші болды. Алла разы болсын. Ол кісіге де аманшылықта жүрсін. Семьясы, бала-шағасына аманшылық тілейміз бәрімізде. Осы жігіттердің бәріне демеушілік көрсетіп, риза болып жатырмыз бәрімізде,-деді.

Әлем чемпионаты 4 жас ерекшелік бойынша өтті. Мұнда жасөспірімдер, кадеттер, жастар және ардагер спортшылар бақ сынады. Солардың бірі- батысқазақстандық Қайнар Жеңісов. Ол әлем чемпионатының қола жүлдегері атанды. Спортшы белдесулердің оңайға соқпағанын айтады.

Қайнар Жеңісов, спортшы:

-Өте жақсы болды. 30 елден аса бүкіл шетелдерден келді.Жақсы деңгейде өтті жарыс. Қиын болды иә. Жартылай финалды орыс балуанынан жеңіліп қалдым.Жалпы қиын болды. Дайындық болды. Қазақстанның іріктеуінен өттік,-дейді.

БҚО-да грэпплинг спорты қарқынды дамып келеді. Осы спорт түрімен 1000-ға жуық спортшы шұғылданады. Елімізде алғаш рет грэпплингтен әлем чемпионаты 2018 жылы ұйымдастырылды. Араға алты жыл салып, елорда 1800-ден астам спортшыны қарсылады. Жыл санап жарыстың ұйымдастырылу деңгейі мен оған қатысатын спортшылардың дайындығы артып келеді. Батысқазақстандық құрама дайындықтарын пысықтап, түрлі сайыста ел намысын қорғамақ!

Орал қаласында Taekwondo itf федерациясының академиясы ашылды. Жаңа ғимараттың ауданы-600 шаршы метрді құрайды. Академияда спортшылардың алаңсыз жаттығуы үшін бар жағдай жасалған. Жайлы спорт зал спортшыларға қажеттінің бәрімен қамтылған. Оралдық мықтылар жайлы жағдайда жаттығуы үшін БҚО Taekwondo itf федерациясының президенті Аралбек Ахметов барын салды. «AKHMETOV TEAM» командасының аты күллі әлемге танымал. Таэквондошылар әлем біріншілігі мен Азия, Еуропа чемпионаттарында топ жарып, алтынды қанжығалап жүр.

Оралда Taekwondo itf федерациясының академиясы ашылды. Оған арналған ғимарат бір жылдай салынды. «AKHMETOV TEAM» командасын қолдауға еліміздің түкпір-түкпірінен келген мейман көп.

Елімізде таэквондоға арналған мұндай спорт зал жоқ. Тек Орал қаласында ғана замануи академия өз жұмысын бастады. Спортшылардың қауіпсіздігі үшін ғимаратта бейнебақылау құрылғылары орнатылыпты. Жаңа спорт залда бокс үйірмесі де жұмыс істейді. Қазіргі таңда таэквондомен 300 бала айнасылады. Олардың санын 2000-ге дейін арттыру жоспарда бар.

Аралбек Сайынұлының еңбегін ата-аналар мен үзеңгілес әріптестері атап өтті. «AKHMETOV TEAM»командасында 1 спорт шебері мен 25 спорт шеберіне үміткер спортшы жаттығады.

Аралбек Ахметов -спортқа 25 жылын арнаған жан. Спорт залдың ашылу рәсімінде Ахметовтың анасы перзентінің жетістігіне марқайып, толқып қуанышын жеткізді.

«AKHMETOV TEAM» командасының алға қойған мақсаты көп. Атақты команда 4 жастан бастап балаларды қабылдайды. Академия Әбілқайыр хан 2 мекенжайында, Сергей Тюленин аялдамасында орналасқан.

Жәңгір хан атындағы Батыс Қазақстан аграрлық-техникалық университетінде "Денсаулық фестивалі" ұйымдастырылды. Фестиваль барысында "Сергек бол" атты спорттық сайыс өтті. Жарысқа оқуға енді түскен 1 курстың студенттері қатысты.

Жәңгір хан университеті жылдағы дәстүрден жаңылмай "Сергек бол" сайысын ұйымдастырды. Спорттық доданы прокурорлар, дәрігерлер мен түрлі қоғамдық ұйым өкілдері қолдады. Мамандар денсаулықты күту, нашақорлық пен зиянды әдеттерден аулақ болуға байланысты кеңестерін аямады. Іс-шараны ұйымдастыруға "Ақ отау" отбасы орталығы демеушілік көрсетті.

Жарысқа 500 студент қатысты. Олар қызықты эстафетада жылдамдыққа жарысты. Ал арқан тартыста кім мықтыны анықтады. Жастар шағын футбол, баскетбол, үстел теннисі, шахмат, тоғызқұмалақ, қол күресі бойынша сынға түсті. Осы күзде Жәңгір хан университетінің студенті атанған жастар спорттық сайысқа құлшына қатысты. Олар жарыста жаңа достар тауып, бос уақытын ұтымды пайдаланды. Студенттер мұндай шара жаңа ортаға келген жандарға қолдау мен мол мүмкіндік екенін айтады.

Әрбір жарыстың жеңімпаздары марапатталды. Үздік нәтиже көрсеткен студенттер оқу орны құрамасының сапына қабылданады. Спортшылар университет намысын түрлі жарыста қорғамақ.

30 тамыз Конституция күні қарсаңында күштік құрылым қызметкерлеріне арналған спорттық сайыс ұйымдастырылды. Сала қызметкерлері арқан тартысып, кір тасын көтеруден жарысты.

"Орал" спорт клубында тұңғыш рет күштік құрылымдар арасында арқан тартыс пен кір тасын көтеруден жарыс өтті. Сайыста 7 команда бақ сынады.

Алғаш рет ұйымдастырылып отырған дода тартысты өтті. Жанкүйерлер қиқулап, қатысушыларды қолдады. Әрбір сынның оңайға соқпағанын анық аңғаруға болады. Сайыстың бас төрешісі күштік құрылымдар жеңіске жету үшін қатысушылардың барын салғанын атап өтті.

Күштік құрылымдар арасында ынтымақтастықты арттыру мен қызметкерлердің физикалық дайындығын пысықтауға арналған іс-шарада жеңімпаздар марапатталды. Келешекте, қызметкерлер арасында футбол, волейбол мен самбодан жарыстар өтпек.

Оралдық таэквондошылар "Азия" чемпионатынан жеңіспен оралды. Жарыс Үндістанның Бангалор шаһарында 19 тамыз бен 25-і аралығында өтті. Тартысты додаға 26 елден мыңдаған спортшы қатысты. Сайыс нәтижесі бойынша еліміз командалық есепте 2 орынға ие болды. Тек қазақстандық құрама Оңтүстік Кореяның спортшыларына есе жіберіпті. Еліміздің құрамасының сапында батысқазақстандық өрендер өнер көрсетіп, жеңіс тұғырынан көрінді. Әлемдік сайыста Алесандро Карбоне 18 жасқа дейінгі балалар арасында екі дүркін Азия чемпионы атанды. Жас өрен бұған дейін де Еуропа мен Әлем біріншілігінде топ жарып, алтынды қанжығаланған еді.

Үндістанның Банголор қаласында таэквондодан Азия біріншілігі өтті. Тартысты доданың нәтижесі бойынша "Ахметов теам" командасының мүшелері 6 алтын, 3 күміс пен 3 қола еншіледі. Үнді жерінде өткен сайыста жас спортшы Алесандро Карбоне екі дүркін Азия чемпионы атанды. Бұған дейін болашағынан көп үміт күттіретін жас спортшы Еуропа мен Әлем біріншілігінде топ жарып, алтынды қанжығалаған еді.

Жарыста топ жарған жас спортшыларды Ақжайық жұртшылығы қошеметпен қарсы алды. Азия ойындарында жеңіс тұғырынан көрініп, ел намысын қорғаған спортшылар қараша айында Өзбекстанның астанасында өтетін Әлем кубогіне дайындалмақ. Қазіргі таңда "Ахметов теам" командасында 300-ден астам жас спортшы жаттығады. Тәжірибелі бапкер өрендерді 4 жастан бастап қабылдайды.

Әуе десаншылары күніне орай, облыс орталығында алғаш рет қарулы күштер, теңіз флоты, шекарашылар мен әуе десанттары ардагерлері шағын футболдан жарысқа қатысты. Сайыста сегіз команда бақ сынады. Жарыс әуе десатшылары күшінің 94 жылдығы мен генерал-майор Уәли Елемановты еске алуға арналды. Уәли Бисақанұлы Ақжайықтың тумасы. Әскери қайраткер саналы ғұмырын елді жаудан қорғауға, әуе кеңестігінің қауіпсіздігіне арнады.

Турнир тартысты өтті. Әрбір команда жеңіс үшін барын салды. Қатысушылар осындай спорттық сайыс салауатты өмір салтын насихаттап, ұрпақ сабақтастығын қалыптастырады,- дейді.

Жарыстың жеңімпазы 2 тамызда салтанатты жиында марапатталмақ. Әуе десантшылары 2025 жылы үлкен парад пен ауқымды спорт шарасын ұйымдастыруды жоспарлап отыр.

Орал қаласында 49 спорт алаңы бар. Шаһар тұрғындары олардың жағдайын жиі сынға алады. Өткен жылы спорт алаңында ойнап жүрген бала қаза тапты. Қайғылы жайттан мамандар қандай сабақ алды?

Балалардың спортқа әуес болып, физиологиялық тұрғыда дұрыс дамуы үшін аулаларда арнайы спорт алаңдары орнатылған. Қазіргі таңда олардың саны 49. Осы алаңдарға "Орал" спорт клубы жауапты.

Өткен жылы спорт алаңында ойнап жүрген бала қаза тапты. Бұл жайт оралдықтардың қабырғасын қайыстырды. Мамандар қайғылы жағдайдан кейін қақпалардың жағдайын мықтап назарға алыпты.

Тұрғындар алаңдардың жағдайын сынға алады. Биыл тозығы жеткен 4 спорт алаңын жөндеу көрмек. Бұл жұмыстар үшін бюджеттен 15 млн теңгедей қаржы бөлінген.

Қала күнін мерекелеу аясында мәдени іс-шаралармен қоса, спорттық сайыстар өткізу дәстүрге айналған. Солардың бірі – қала әкімінің жүлдесіне арналған волейбол додасы. Биылғы жарыс 16 команданың басын қосқан. 2007-2008 және 2010-2011 жылы туған спортшылар арасында өтуде. Маңғыстаулық «Каспий» командасының Орал шаһарына бірінші мәрте келуі. Алғашқы екі ойында төмен ұпай жинаған волейболшылар «кезекті кездесуде белсенділігімізді арттырамыз» дейді.

АБАЙ ӘМІРХАНОВ

МАҢҒЫСТАУДЫҢ «КАСПИЙ» ВК ОЙЫНШЫСЫ

ЕРЛАН ОТИМОВ

МАҢҒЫСТАУДЫҢ «КАСПИЙ» ВК ЖАТТЫҚТЫРУШЫСЫ

Турнирдің ашылу салтанатына қала әкімі Миржан Сатқанов қатысып, волейболшыларға сәттілік тіледі. Шаһарда спорттың дамуы қарқын алып, бұқаралық спортпен шұғылданушылардың қатары артқанын да атап өтті.

МИРЖАН САТҚАНОВ

ҚАЛА ӘКІМІ

Волейбол додасына Ресейдің «Нова» командасы, Мәскеу, Новокуйбышевск қалалары, Орынбор, Самара облыстары, Башқұртстан Республикасының Уфа қаласынан спортшылар қатысуда. Сондай-ақ еліміздің Астана, Павлодар, Шымкент, Орал, Астана, Ақтөбе, Атырау, Ақтаудың командалары бақ сынауға ниет білдіріпті. «Бірінші ойыннан-ақ волейболшылардың тың дайындықпен келгені байқалады» , - дейді төрешілер. Жеңімпаз құрама мен үздік ойыншылардың есімі 8 қыркүйекте анықталады.

Орал қаласында баскетболдың стритбол түрі бұқаралық сипат алып келеді. Оның дәлелі - облыстық турнирде 40-тан астам команданың қатысуға ниет білдіруі. Жарыс алғаш рет ұйымдастырылғанына қарамастан БҚО, Орал және Ақсай қалаларымен қоса, Шыңғырлау ауданы, жеке мектеп спортшыларының да басын қосты. Жасөспірім ұлдар арасындағы доп додасы облыстың баскетбол және стритбол федерациясының қолдауымен өткізіліп отыр.

ЗИНҰР РАМАЗАНОВ

БАСКЕТБОЛ МЕКТЕБІНІҢ ДИРЕКТОРЫ

Стритбол 1950 жылдары АҚШ-та пайда болыпты. Баскетболдан ойыншылар санымен ерекшеленеді. Әр командадан 3 ойыншы баскетбол алаңының жартысын, бір сақинаны пайдаланады. Өңір спортшылары бұл ерекшеліктерді жетік меңгеріпті. «БҚО ARLANS» командасы тәжірибелі, әрі біраз жетістікті бағындырып үлгерген құрама. Облыстық турнирде тағы бір жеңісті қанжығаға байлады. «Кезекті жарыс тартысты ойын өрнегімен есте қалды. Жаңа достармен таныстық» дейді команда капитаны.

МАНСҰР АЮП

«БҚО ARLANS» КОМАНДАСЫНЫҢ КАПИТАНЫ

Турнир қорытындысына сәйкес үздік командалар 4 категория бойынша анықталды. Жеңімпаздар мен жүлдегерлерге кубок, медаль және естелік сыйлықтар табысталды. Ұйымдастырушылардың айтуынша, ойын барысында үздік ойыншылар облыс құрамасының мүшелігіне іріктеледі.