"Атамекен" өнер ордасында ұйымдастырылған мерекелік кеште өңірдің мәдениет пен өнер саласына сүбелі үлес қосып жүрген азаматтары марапатқа ие болды. Жиын барысында Батыс Қазақстан облысының әкімі Нариман Төреғалиев құттықтау сөз сөйлеп, сала мамандарына ерекше құрмет білдірді. Өз сөзінде аймақ басшысы облыста мәдениет пен өнерді дамыту бағытында жүзеге асып жатқан жұмыстарға тоқталып, жобалар мен бастамалар туралы кеңінен баяндады. Сондай-ақ өңірдің мәдени әлеуетін арттыру жолында еңбек етіп жүрген сала мамандарына көрсетіліп жатқан қолдау мен жасалып жатқан жағдайларды да атап өтті. Облыс әкімінің айтуынша, мәдениет қызметкерлерінің кәсіби деңгейін көтеруге, материалдық-техникалық базаны жаңартуға және шығармашылық бастамаларды қолдауға айрықша назар аударылып отыр.
Салтанатты кеш аясында Ел Президентінің атынан бірқатар сала қызметкерлері Құрмет грамоталары және Алғыс хаттармен марапатталды. Сондай-ақ ұзақ жыл аталған салада еңбек еткен ардагерлерге де лайықты құрмет көрсетілді. Марапат иелерінің бірі - оБЛЫСТЫҚ ФИЛАРМОНИЯНЫҢ СОЛИСІ, композитор - Жаскелең Ғайсағалиев. Өнер иесіне "Қазақстанның еңбек сіңірген қайраткері" атағы берілді.

Бұдан өзге, шара аясында Ғарифолла Құрманғалиев атындағы облыстық филармония жанындағы Дәулеткерей атындағы қазақ халық аспаптар оркестрінің 25 жылдық мерейтойына орай Ұлттық мәдениетімізді дамытуға қосқан үлесі үшін оркестр ұжымы Президенттің Құрмет грамотасына ие болды.

Мәдениет пен өнер – қоғамның рухани деңгейін көрсететін басты сала. Өнер ұжымдарының қажырлы еңбегі мен талантын ұштастырып, халық игілігі үшін қызмет етіп келеді. Мерекелік кеш соңы концерттік бағдарламаға ұласты. Бұл – өнер адамдарына көрсетілген шынайы алғыс пен құрметтің белгісі болды.

Орал қаласында Қазақстан Республикасының еңбек сіңірген әртісі, белгілі термеші, күміс көмей әнші Қалампыр Рахимованың 75 жылдығына арналған "Ақжайықтың Ақкербезі" атты республикалық әнші-термешілердің байқауы өтті. Сайыста 18 әнші бақ сынады. Бес жыл сайын ұйымдастырылатын байқауға арнайы Астана қаласы, Ақтөбе мен Маңғыстау, Қызылорда облысы мен Бәйтерек, Қазталов, Қаратөбе ауданынан термешілер қатысты.

Дәстүрлі әнші, кешегі Ғарифолла Құрманғалиевтың шәкірті, термеші Қалампыр Рахимованың 75 жылдығына арналған байқау ұйымдастырылды.

Қалампыр Рахимова Шыңғырлау ауданының, Алмаз ауылына қарасты Соркөлде дүние келген. Мектеп бітіріп, Алмаз ауылында клуб меңгерушісі болып жұмыс істейді.

Ғарифолла Құрманғалиевтің шәкірті- қазақтың домбырасы мен терме өнерін таныту үшін өмірін арнаған жан. Күміс көмей әнші "Гүлдер" ансамблінде өнер көрсеткен. Небары 39 жыл өмір сүрген өнер иесі артында мол мұра қалдырды. Қалампыр Рахимова күллі қазақтың мақтанышына айналды. Оның өнері мен ғибратты ғұмыры өскелең ұрпаққа үлгі. Осы байқауда Шыңғырлаудың Алмаз ауылынан Сұлужан Задыгер бақ сынады. Бойжеткен жастайынан термеге әуес болып өседі. Сұлужанның арманы Қалампыр апайы секілді қазақ өнеріне еңбек етуде.

Республикалық әнші-термешілердің байқауына елордадан Ақбота Ерланқызы арнайы ат терлетіп келді. Бүгінде бойжеткен Астана қаласында білім алады.

Әнші-термешілердің байқауы ел аумағында сирек ұйымдастырылады. Байқауға қатысушы өнерпаздар осындай ұлттық өнерді ұлықтайтын байқаулар көп болса деген тілегін білдірді. Қалампыр Рахимованың байқауында Қазталовтық Аяжан Елемес бас жүлдені қанжығалады.

Жәңгір хан атындағы Батыс Қазақстан аграрлық-техникалық университетінде "Денсаулық фестивалі" ұйымдастырылды. Фестиваль барысында "Сергек бол" атты спорттық сайыс өтті. Жарысқа оқуға енді түскен 1 курстың студенттері қатысты.

Жәңгір хан университеті жылдағы дәстүрден жаңылмай "Сергек бол" сайысын ұйымдастырды. Спорттық доданы прокурорлар, дәрігерлер мен түрлі қоғамдық ұйым өкілдері қолдады. Мамандар денсаулықты күту, нашақорлық пен зиянды әдеттерден аулақ болуға байланысты кеңестерін аямады. Іс-шараны ұйымдастыруға "Ақ отау" отбасы орталығы демеушілік көрсетті.

Жарысқа 500 студент қатысты. Олар қызықты эстафетада жылдамдыққа жарысты. Ал арқан тартыста кім мықтыны анықтады. Жастар шағын футбол, баскетбол, үстел теннисі, шахмат, тоғызқұмалақ, қол күресі бойынша сынға түсті. Осы күзде Жәңгір хан университетінің студенті атанған жастар спорттық сайысқа құлшына қатысты. Олар жарыста жаңа достар тауып, бос уақытын ұтымды пайдаланды. Студенттер мұндай шара жаңа ортаға келген жандарға қолдау мен мол мүмкіндік екенін айтады.

Әрбір жарыстың жеңімпаздары марапатталды. Үздік нәтиже көрсеткен студенттер оқу орны құрамасының сапына қабылданады. Спортшылар университет намысын түрлі жарыста қорғамақ.

Облыс орталығында қазақтың ұмыт бола бастаған дәстүрін жаңғырту мақсатында "Тойбастар" этнофестивалі өтті. Мәдени шара Тұңғыш президент алаңында ұйымдастырылды.

Тойбастарды көруге келген жандардың қатары қалың. Өнерпаздар көрермендердің көңілінен шығу үшін барын салды. Қазақтың ұмытыла бастаған салт-дәстүрлерін көрсетіп, күміс көмей әншілер ән салып, әуелете күй тартты.

"Тойбастар" фестивалі барша қолөнер шеберлерінің басын қосты. Шеберлер өнерлерін паш етті. Оларды қызықтаған жандар көп. Іс-шара барысында ақ жаулықты әжелер киіз басты. Ертеде қазақ киізді тастамай, қастер тұтқан. Қазір табиғи өнімге деген сұраныс аз.

Он саусағынан бал тамған шеберлер құрақ көрпелерін, қыз жасауларын, ұлттық киім үлгілерін бұқараға көрсетті. Ою-өрнекпен өрілген бұйымдарға қызығушылық жыл санап артып келеді.

Тойбастарды оралдықтар кеңінен тойлады. Арнайы осы іс-шара үшін киіз үйлер тігіліп, жергілікті тауар өндірушілер де өнімдерін халыққа таныстырды. Отандық өнімді қолдаған жандар көп. Этнофестиваль оралдықтардың көңілінен шықты.

"Тойбастар" этнофестивалінде балалар асық атып, тоғызқұмалақ ойнады. Этнофестиваль қала күні қарсаңында өз жалғасын таппақ.

1961 жылы Халықаралық Театр институты Вена қаласында өткен IX конгресте 27 наурызды «Халықаралық театр күні» деп бекітті. Жыл сайын театр күні ерекше деммен тойланады. Бұл күні айтылатын тілек сахна тарландарына арналып, театр әртістерінің кәсіби шеберлігі жоғары бағаланады.

Театр - саф өнер ордасы. Ондағы әр қойылым мәдени-рухани құндылық, эстетикалық тәрбиенің көрінісін бейнелейді. Ал көрермен болса, спектакльдің жанрына қарай астарлы ой түйеді. Бұл орайда, өңірдегі қара шаңырақ - Х.Бөкеева атындағы қазақ драма театры облыс тұрғындарының жүрегіне жол тапқан. Аймақ басшысы Нариман Төреғалиев өнер ұжымын кәсіби мерекемен құттықтады.

Хадиша театры көзі қарақты көрерменге 200-ден астам қойылым ұсынып үлгерген. Олардың ішінде батысқазақстандықтар ерекше ықыласпен қабыл алған 150 қойылым бар. Әр туындыны жоғары деңгейде алып шығуға атсалысатын бір топ қызметкердің еңбегі, шеберлігі осындайда байқалады. Бас режиссер, дыбыс және жарық режиссерлері, әрлеуші мен дизайнер, театр әртістері өнер ұжымының бір-бірінен ажырамас бөлшегі ретінде театр деген ұғымды толықтырып тұрады.

Айтулы күні Хадиша театрының әртістеріне БҚО-ның «Үздік мәдениет қызметкері», «Еңбек даңқы» төсбелгісі, облыс әкімі, салалық мәдениет, спорт, туризм және ақпарат қызметкерлерінің кәсіп одағы, мәдениет, тілдерді дамыту және архив ісі басқармасы басшысының Алғыс хаттары табысталды.

14 наурызда еліміздің батыс аймағына тән «Көрісу күні» тойланады. Кейбір өңірлер бұл күнді «амал мерекесі» деп те атайды. Көктемнің бастауы саналатын атаулы дата жылдар жылжыған сайын маңыздылығын жоғалтпай келеді. Жылдағы дәстүрден жаңылмай, Ақ Жайық жұртшылығы «Атамекен» өнер ордасында Көрісу күнін атап өтті. Театрландырылған көрініс арқылы мерекедегі жоралғылар айшықтала түсті. Салт-дәстүр насихатталып, өнер ұжымдары ән мен биден шашу шашты.

Өнер ордасының фойесінде тұрғындар арқа-жарқа, көтеріңкі көңіл күйде. Қол алысып, төс қағыстырған үлкенді-кішілі тұрғындардың жаңа күннен үмітті екені сезіледі. Камзол киген әжелердің әсем әні мен домбырашылар тартқан күй күмбірі - бәрі жарасымды. Бұл күні ақсақалдан бата алып, ақ жаулықты ананың тілегіне құлақ түрмеу мүмкін емес.

Көрісу қазақ халқының Жаңа жылы саналатын Ұлыстың Ұлы күні - 22 наурыз мерекесінің бастауы. Сондықтан білім ордалары мен балабақшаларда, мәдени нысандар мен кітапханалар қабырғасында танымдық шаралар жалғасатын болады.

Соғыс және еңбек ардагері Еслям Ғиззатов Батыс Қазақстан облысының Жәнібек ауданында дүние келген. Жастайынан ерте қызметке араласқан Еслям Ғиззатұлы еңбек майданында шыңдалды. Самарқант қаласында өз күшімен білім алған. Өмірінің жалынды шағы соғыспен, Кавказды азат етумен тұспа-тұс келді. Соған қарамастан, парасат-пайымы мол тұлғаның бейнесін қалыптастырған жанның артында өнегелі ісі қалды. БҚО тарихи-өлкетану музейі көрме арқылы Еслям Ғиззатовтың өмір жолын өскелең ұрпаққа жеткізуді мақсат етіп отыр.

Қолдағы дерек бойынша Еслям Ғиззатов отты жылдардан кейін басшылық лауазымдарды тізгіндеген. Оның ішінде облыстық сауда басқармасын басқарды. Сондай-ақ депутат қызметін атқара жүріп, Оралдағы №22 орта мектептің құрылысын салуға ықпал еткен. Өкініштісі, жаңа білім ордасының ашылуына денсаулық жағдайына байланысты қатыса алмапты. Бүгінде ардагердің қыздары әке жолын жалғап, білім саласындағы жұмысты жалғастыруда. Мұражайда ұйымдастырылған танымдық шараны ардақты әкенің отбасы қуанышпен қабылдаған.

Облыстық тарихи-өлкетану музейі жылдан жылға жаңа экспонаттармен толығып келеді. «Мұражай қорында туған өлкенің гүлденуіне қызмет атқарған Еслям Ғиззатов секілді тұлғаға қатысты жәдігерлердің болуы өскелең ұрпақ жадында аға буын есімі сақталуына септігін тигізеді»,-дейді музей қызметкерлері. Айта кету керек, соғыс және еңбек ардагері Еслям Ғиззатовты еске алуға арналған көрме алғаш рет ұйымдастырылып отыр. Музей қабырғасында екі апта бойы қала тұрғындарының назарына ұсынылатын болады.

«Асар жолы» жобасы Орал шаҺарына келіп жетті. Қор өкілдерін Ақжайықтықтар Тұңғыш президент алаңында ерекше қарсы алды. 16 шілде күні Елордада өз сапарын бастаған қайрымдылық марафоны жеткен бұл 7-ші қаласы.

Сәйгүліктерін сайлап, Ақжайық төріне табан тіреген «Асар жолы» қайрымдылық жобасы өкілдерін Оралдықтар құшақ жая қарсы алды. Халықтың осал топтары үшін шырылдап, олардың әлеуметін артыру үшін бар күш-жігерін салып жүрген «АсарҮме» командасына арнап Тұңғыш президент алаңына киіз үйлер тігіліп, шашу шашылып, ақ дәм ұсынылды.  Шілденің 16 жұлдызында өз сапарын бастаған бұл жобаның басты мақсаты- Қазақстанның барлық қалаларын аралап, аз қамтылған отбасылдарға жеке баспана сыйлау. Халық арасында мейрімділікті, адалдықты, қайрымдылықты насихаттау. Айта кетейік, жоба басталғалы бері табан тіреген 6 қалада «Асар үме» командасы 12 отбасыға тұрғын үйлі болуға көмектесті. Соңғы 3 жылда «Асар үме» командасы халықтың қолдауымен бүкіл ел бойынша 455 отбасыға баспана сыйлады. Сонымен қатар халықтың әлеуметтік осал таптарының өмір сүру деңгейін жақсартуға, тұрмысы төмен отбасырады жұмысқа орналастыруға, оқу оқып, білім алуға қол ұштарын созып келеді. Орал қаласындағы өз миссиясын аяқтаған соң «Асар жолы» Атырау, Ақтау қалаларына ат басын бұрмақ.

Қаламыздағы көздің жауын алар субұрқақтардан неше түрлі инфекциялар табылуы мүмкін. Сол себепті де қалалық санитарлы-эпидемиологиялық бақылау басқармасының мамандары қала аумағындағы субұрқақтардан су сынамаларын алып, тексеріске жіберді.

Қалалық санитарлы-эпидемиологиялық бақылау басқармасы әркез тазалыққа баса назар аударады. Осы орайда қала аумағындағы субұрқақтар да назардан тыс қалмайды. Ағымдағы жылдың 6-маусым күні Мемлекеттік тапсырысқа сәйкес: Ж.Молдағалиев көшесінде орналасқан және Пугачев, Лермонтов, С.Датов, Чапаев, сондай-ақ тұңғыш Президент саябағындағы фонтандарға мониторинг жүргізіліп, су сынамалары алынды. Жаздың аптап ыстығында жұртшылық субұрқақтарды паналауды әдетке айналдырады. Қаламызда бұндай 25 нысан бар. Фонтан сулары ешқайда ақпай, бір жерде тұрғандықтан тез ластанады. Мұндай суға бір сүңгіп шыққан баланың жұқпалы дертке шалдықпасына ешкім кепіл бола алмайды. Әрине ойын балалары мұны еш ескермейді. Қаламызға көрік беріп тұрған бұл субұрқақтардың қауіпті жақтары да жоқ емес. Сол себепті оларда шомылуға болмайды. Мәселен, осыдан бірер жыл бұрын Қазақстанда субұрқақтарға шомылып, тоққа соғылған жағдайлар көптеп кездескен. Құрметті қала тұрғындары, өзіңіздің және жақындарыңыздың денсаулығына зиян келмегенін қаласаңыздар, жазғы уақытта фонтан суларына түспеулеріңіз және тұтынбауларыңыз сұралады.

Өңірде әкімдердің халық алдында есебі жалғасуда. Өткен аптаның жұмасы күні Қаратөбе ауданының әкімі Қадыржан Сүйеуғалиев аудан активі мен тұрғындар алдында өткен жылы атқарылған жұмыстар мен алдағы орындалар жұмыс жоспарын таныстырып өтті. Аудан халқы өңір басшылары мен басқарма мамандарына толғандырған сауалдарын жолдап, жауаптарын алды. Әуелі бейнеролик көрсетіліп, жиынға қатысушылар Қаратөбе ауданының тәуелсіздік жылдарындағы жетістіктерімен танысты. Аудан әкімі Қадыржан Сүйеуғалиев өткен жылы ауданның әр саласында жүзеге асырылған жұмыстар жайында баяндама жасады.Мұхит пен Ғарифолла, Ескендірдей дара тұлғаларды тудырған қасиетті мекен тұрғындарының негізгі ата кәсібі-ауыл шарауашлығы саласы. Биыл өздеріңізге белгілі -ауданда ылғал мол. Сол себепті шарулар жетістігі көп жыл болатынынына нық сенімді. Айта кету қажет тасқын судан зардап шеккен шалғындықтарға мемлекет тарапынан қолдау болады. Шығын толықтай өтеліп, табиғи апаттың салдары жойылады. Бүгінгі таңда ауыл тұрғындары өздерінің үйлеріне оралған. Өз баяндамасында ауданда атқарылған жұмыстармен қатар алдағы уақытта жүзеге асырылар жобаларға тоқталған әкім көктемгі су тасқыны кезінде табиғи апатқа тап болған Шалғын ауылына арнайы келіп, тұрғындар жағдайын біліп, тұрғын үй мен мектеп салу мәселелері бойынша оң шешім қабылдағаны үшін өңір басшысына аудан халқы атынан алғысын білдірді. Аудан басшысы Қадыржан Сүйеуғалиевтың айтуынша, жергілікті жерде шағын кәсіпкерлік саласын дамыту - жаңа жұмыс орындарын ашып, бюджеттік қаржыларды толықтырумен қатар экономиканың одан әрі өсуінің және халықты жұмыспен қамтудың, тұрғындардың әл-ауқатын жақсартудың негізіне айналып отыр. Қазіргі таңда аудан бойынша 1014 шағын және орта кәсіпкерлік субъектісі тіркелген. Есептік кезеңде жаңа 53 кәсіпкерлік субъектісі ашылды. Бұл салада 1 265 адам жұмыс жасайды.
Ауданда жерге қатысты мәселелер бар. Жерді алып, пайдаланбай отырғандар қарасы аз емес. Жалпы ауданда сәуір айынан бастап мониторинг топ өз жұмысын бастаған. Есептік кездесуде тұрғындарды толғандырған мәселеге басым бағыт берілді. Жиында жалпы әлеуметтік желілерден 8 сұрақ және 6 тұрғыннан жиырмаға жуық сауал мен ұсыныстар жолданды. Әлеуметтік желілер арқылы түскен «Ханкөл ауылына мектеп салына ма?», «Үшағаш ауылына медпункт салу жоспарда бар ма?» деген сынды сауалдар мен Ханкөл ауылынан Орал-Ақтөбе күре жолына қосатын жолдың салынуы, Сулыкөл ауылынан аудан орталығына қатынайтын 27 шақырым жолды ағымдағы жөндеу, Шөптікөл ауылына бұрылыстағы 2 шақырым жолдың құрылысы қай уақытта жүзеге асатындығы турасында қойылған сұрақтарға тиісті басқарма басшылары жауап қайтарды. Өз кезегінде сөз алған аудандық ардагерлер кеңесінің төрағасы Рамазан Қыдырашев пен облыстық мәслихат депутаты Жаңабек Жақсығалиев Саралжын округін ауданмен жалғайтын жолға былтыр ағымдағы жөндеу жүргізілгенімен айтарлықтай нәтиже болмағандығын тілге тиек етті. Халықпен жүздесу жиынында Аққозы, Саралжын ауылдық округтеріндегі ауыз су мәселесі, қала мен аудан арасына қатынайтын такси қызметі ақысының қымбаттығы, ауданда медицина мамандарының жетіспейтіндігі, былтыр пайдалануға берілген 67 үйдің құрылыс сапасына байланысты шағымдар сынды маңызды мәселелер көтеріліп, облыс басшысының назарына ұсынылды.Айтылған барлық мәселелерді мұқият тыңдаған Ғали Есқалиев халықты толғандырған сұрақтар назарда болатындығын еске салып, мүмкіншілігіне қарай шешу жолдары қарастырылатындығын атап өтті. Кездесу соңында азық-түлік тауарларының қымбатшылығына байланысты ойын білдірген облыс басшысы қазіргі геосаяси ахуалдың салдарынан бағаның көтеріліп тұрғандығын тілге тиек етіп, сары май, ет, сүт өнімдері мен көкөністерді жергілікті жерден өсіріп, табиғи өнімдерді барынша пайдаланып, аста-төк ысырапшылдыққа жол бермеуге шақырды.Қаратөбе ауданындағы есептік кездесуден кейін өңір басшысы Ғали Нәжімеденұлы мен бірқатар облыстық басқарма басшылары аудан тұрғындарын жеке мәселелер бойынша қабылдау жүргізді.