"Балаларымыз қайда оқиды?". Осындай сауалды Сәкен мен Айти мектептің ата-аналары маусым айынан бері қойып келеді. Күрделі мәселе жаңа оқу жылы басталар шақта өз шешімін таппай отыр. Оқуға санаулы күн қалғанда ата-аналар балаларын қай мектепте оқытарын білмей дал. Өткен жұмада бір топ ата-ана білім басқармасына барып, мән-жайды анықтап, мәселені шешуді талап еткен еді. Араға бір апта салып, олар облыстық әкімдікке әділдік сұрап барды.

"Даудың басы Дайрабайдың көк сиыры" маусымда басталды. Екі ай бұрын Сәкен мен Айти мектепке оқуға түскісі келетін оқушылар арнайы тест тапсырады. Сол сынақтан бастап оқушылардың қай мектепке оқитыны туралы сауалға жауап табылмай келеді. Ата-аналар жаңа оқу жылы қарсаңында балаларын қай мектепке оқытарын білмей дал. Өткен аптада бір топ ата-ана әділдік іздеп, білім басқармасына барған-ды. Сол кезде мән-жайды зерделейтін комиссия құру туралы ұйғарымға келді. Комиссия 3 күннің ішінде мәселені зерттеді.

Жыл сайын Сәкен мен Айти мектепке оқушыларды оқуға қабылдау жұмысы үшін арнайы тендер ұйымдастырылады. Бұрындары мемлекеттік тапсырысты "Дарын" мекемесі ұтып келген. Осы екі жыл көлемінде өзге мекемелер жеңіске жетіпті. Алайда өткен жылы ұтқан компания "Дарынмен" бірлесіп, емтихан өткізген. Биыл "Недвижимость сити немесе Абырой" компаниясы тендер ұтқан. Мектеп әкімшілігі сынақта академиялық адалдық болады дегенді айтады. Мердігер компания емтихан қарсаңында сынақ тапсыратын орынды 3 рет өзгерткен. Бұл күрделі мәселеде 3 тарап бар. Бірі-емтиханды естімегендер, бірі-тесттен құлағандар, соңғысы-емтиханнан сүрінбегендер.

Балалары сынақтан сүрінбей өткен бір топ ата-ана облыстық әкімдікке келіп, аймақ басшысы орынбасарының қабылдауына жазылыпты. Алайда әкімнің орынбасары іс-сапарға кетуіне байланысты тұрғындарды қабылдамады. Қабылдау залында тек білім басқармасы басшысының орынбасары болды. Ата-аналар басқарманың жауабын білеміз деп, басшы орынбасарына сұрақ қоюдан бас тартты. Оқиғаның мән-жайын анықтау үшін білім басқармасынан сұрадық. Алайда мемлекеттік мекеме сот болып жатыр, 3-ші тарап араласпау керек деп қысқа қайырды. Қос мектепке тапсырған балалардың мәселесі әлі өз шешімін таппай келеді. Оқуға санаулы күн қалғанда 700-ге жуық баланың қай мектепке оқитыны әлі белгісіз.

Санаулы күндерден соң жаңа оқу жылы басталады. 2024-2025 оқу жылының сапалы әрі қиындықсыз өтуі үшін тыңғылықты дайындық қажет.

Өскелең ұрпақтың сапалы білім алуы үшін заман талабына сай жабдықталған мектеп керек. Облыста 10 үш аусымда оқитын, 16 апатты деп танылған білім ордасы бар. Осы мәселені жою үшін аймақта "Жайлы мектеп" ұлттық жобасы аясында 2023-2025 жылдары 18 мектептің құрылысы жоспарланды.

Жаңа ғимараттың құрылысынан бөлек, алты мектеп күрделі жөндеуден өтуде. Екі нысанның жөндеуі өткен жылы басталды.
Білім саласында сапаны қамтамасыз ету департаменті оқу процесін бақылап отырады. Мемлекет басшысы оқушылардың әлеуметтік статусына қарамастан ыстық тамақпен қамтуды тапсырған еді.

Жаңа оқу жылының қарсаңында оқушыларды оқулықтармен қамту ісі де бақылауда. Биыл облыстық бюджет есебінен 13 баспадан 661 754 дана кітап сатып алынды. Оқулықтарды тасымалдау үшін қазынадан 33,5 мнл теңге бөлінді. Кітаптарды толықтай өңірге тасымалдау ісі 25 тамызда аяқталады деп күтілуде.

СУРЕТ https://qarmaqshy-tany.kz/ САЙТЫНАН ЖҮКТЕЛДІ.

Орал қаласында мемлекеттік қызметшілерге арналған "Self-менеджмент. Үздіксіз даму" атты семинар-тренинг өтті. Алғаш рет ұйымдастырылған шарада Қазақстан Республикасының мемлекеттік басқару академиясының мемлекеттік саясат ұлттық мектебінің профессоры, экономика ғылымдарының кандидаты Жанболат Даухарин дәріс оқыды.

Алғаш рет ұйымдастырылған өз-өзіңді бақылауға арналған дәріске қызыққандар көп. Департамент, басқарма басшылары мен әкімдік қызметкерлері "Self-менеджмент. Үздіксіз даму" тренингіне қатысты.

Күн сайын құбылып отырған заманда өз-өзіңді дамытып, жұмыс істеу маңызды. Үйренген адамға Self-менеджмент-тің пайдасы мол. Менеджер уақытын тиімді пайдаланып, келіссөздердің оңтайлы жүргізіп, көшбасшылық қабілетін шыңдайды.

Президент жанындағы мемлекеттік басқару академиясы басқару академиясының БҚО филиалы мемлекеттік қызметшілердің кәсіби біліктілігін арттырумен шұғылданады. Биыл 1500 маманды оқыту жоспарланыпты. Бірінші жартыжылдықтың қорытындысы бойынша 740-тан астам мемлекеттік қызметкер білім алды.

СУРЕТ klever.blog  САЙТЫНАН ЖҮКТЕЛДІ.

Түркістандық дихандар биыл өңірге мол су келгеніне разы. Шаруалар 10-15 күнде жаңа өнімді жинауға кіріспек. Бұл туралы үкіметтің баспасөз қызметі хабарлады. Ауыл шаруашылық өнімдерінің мол болуы үшін судың мөлшері жеткілікті болуы шарт

Суару науқаны кезінде түркістандық шаруаларға Қызылқұм каналы арқылы Шардара су қоймасынан 682 млн метр куб су берген. Қазіргі таңда қоймада 2,6 млрд м3 тіршілік нәрі бар. Бұл өткен жылмен салыстырғанда 600 млн метрге көп.

Шаруалардың кәсібін дөңгелентіп, мол пайдаға кенелуі үшін тұрақты түрде сумен қамтылуы шарт. Тіршілік нәрінің қажетті деңгейде болуына байланысты дихандар биыл мол өнім жинайды. Қарбыз өсіріп отырған шаруалар тамыз айында екінші мәрте өнім алады.

Суару науқаны басталғалы көрші Өзбекстаннан Қазақстанға 3,9 млрд текше метр су келді. Бұл- мемлекет аралық су шаруашылығы комиссиясының бірлескен жұмысының жемісі.

Қазақстанда 7,5 мың мұғалімді қаржылық сауаттылыққа оқытады. Ұстаздар мектеп оқушылары мен студенттердің білімін шыңдайды. Бұл туралы “Amanat” партиясы хабарлады. Игі бастама “Қарызсыз қоғам” жобасы аясында іске аспақ. Осылайша жастарды үлкен өмірге дайындап, қаржысын тиімді басқаруды үйретуді көздейді.

Мектеп мұғалімдері мен колледж, университетте сабақ беретін оқытушылар арнайы семинарларға қатысады. Қатысушыларымен "AMANAT" партиясының төрағасы Ерлан Қошанов, ғылым және жоғарғы білім министрі Саясат Нұрбек пен оқу-ағарту министрі Ғани Бейсембаев кездесті. Мәжіліс төрағасы ұстаздар білім әлеміне бағыттайтын тұлға, жастар мұғалімдерден үлгі алады,- дейді.

Жаңа пәннің мақсаты- қаржыны басқаруға үйретіп, тұрғындардың несиесін азайту.

Барлық қатысушылар жобаның маңыздылығын атап өтті. Ұйымдастырушылардың мәліметіне сенсек, биыл 450 мың оқушы мен 100 мың студент қаржылық сауаттылық бойынша білім алады. Сондай-ақ, 200 мың адам қосымша оқыту курстарында оқиды.

Жобаның ұйымдастырушылары қаржылық сауаттылық бойынша білім ақшаны басқаруға, үнемдеуге және жауапкершілік алуға үйретеді,- дейді. Бұл қарыздың қамытынан арылуға, алаяқтарға алданбауға және кәсіпкерлік қабілетті арттырып, келешекке деген сенімді ұялатады.

сурет atr.kz сайтынан жүктелді.

Орал қаласында атом электр станциясын салу бойынша жария талқылау өтті. Тыңдалымға белсенділер, қоғамдық ұйым өкілдері мен энергетика саласының ардагерлері қатысты.

АЭС салу мәселесі -өте өзекті. Қазіргі таңда елімізде электр энергиясы тапшы. Осы тапшылықтың кесірінен көршілес елдерден электр қуатын сатып алуға мәжбүрміз. Атом электр станциясы Қазақстан үшін таңсық дүние емес. Қазірдің өзінде ел аумағында 3 реактр жұмыс істейді.

"АЭС қай жерде салынады?"- деген сауал қазақстандықтарды толғандырады. Алғашында екі аумақ таңдалыпты. Бірі -Абай облысында болса, енді бірі- Алматы облысына қарасты аумақ.

Атом электр станциясын қай ел салады деген сауал көпті толғандырады. Қазіргі таңда 4 ірі алпауыт компанияның жобасы іріктеуден өткен.

АЭС-тің экологияға әсері көпті алаңдатып отыр. Мамандар салынуы мүмкін атом электр станциясының 3 буынының қоршаған ортаға залалы аз. Көп суды да тұтынбайды деседі.

Мамандарды мұқият тыңдаған батысқазақстандықтар емін-еркін пікірін ортаға салып, сауалдарын жолдады.

Әлемде бейбіт мақсатта салынған атом электр станциясының шарапатын көріп отырған елдер көп. Бұл тізімде АҚШ көшбасшы. Кәрі құрлық Еуропада да Аэс көп. Жаңадан стратегиялық нысанды салып жатқан елдер де көп. Қытайдың аумағында 25 АЭС салынбақ. Ал елдегі атом электр станциясының тағдыры жалпыұлттық референдумда шешілмек. Маңызды шара осы жылдың күзінде ұйымдастырылады деп күтіледі.

Биыл 9000-нан астам батысқазақстандық ұстаз біліктілігі бойынша тест тапсырады. 9 шілде мен 12 шілде аралығында педагогтер тестілеуге өтініш беріп, жазылған еді. Сынақты Орал мен Ақсай қаласында "Юстади" өңірлік тестілеу орталығында тапсырады. Осы уақытқа дейін 2 мұғалім тестілеу ережелерін бұзып, аудиториядан шығарылды. Біліктілігі бойынша сынақ тапсыратын ұстаз бірінші рет тегін, тесттен құлап қалса, 2 рет тамыз айында ақылы түрде аттестациядан өтеді.

Сурет https://aikyn.kz/ сайтынан жүктелді

Орал қаласында Жәңгір хан атындағы Батыс Қазақстан аграрлық-техникалық университетінің жас түлектері диплом алуда. Биыл іргелі оқу орнын 1200-ге жуық жас аяқтайды. Салтанатты шара университеттегі агро-технологиялық институттан басталды.

Бұл күнді жас түлектер асыға күтті. Олардың жүздерінен қуаныш пен қимастықты жазбай танисың. Бауыр еті баласы мен туыстарын қолдап келген жандардың қарасы қалың. Диплом табыстау рәсімі университеттің Агротехнологиялық институтынан басталды. Бүгінгі таңда 60 жылдан астам тарихы бар Жәңгір хан университетінде 4000-нан астам студент білім алады. Олардың 1200-ге жуығы биыл жас маман қатарын толықтырмақ.

Өткен жылы университет түлектерінің 87 пайызы бір жылдың ішінде жұмысқа орналасқан. Оқу ордасының түлектері бәсекеге қабілетті, сұранысқа ие. Жас мамандар армандаған мамандығы бойынша біліп алып, түрлі байқауларға қатысып, университеттің қоғамдық өміріне белсене араласты. Солардың бірі-президент шәкіртақысының иегері Гүлім Асқарова.

Салтанатты іс-шара алдағы 3 күнде аяқталмақ. Бұдан әрі университеттің «Индустриалды технологиялық», «Экономика, ақпараттық технологиялар және кәсіби білім беру», «Ветеринарлық медицина және мал шаруашылығы» институттарының түлектері диплом алады.

Түркі елдерін байланыстыратын ортақ құндылық - тарих пен мәдениет, тіл мен діл, өткеннің сырына қанықтыратын мұрағат пен тарихи жәдігерлер. Бұны ғылыми тұрғыда зерттеп, насихаттау ұрпаққа қалар мұра болмақ. Мемлекет басшысы Астанада өткен түркі мемлекеттері ұйымының 10-шы саммитінде ортақ өркениетті зерттеу жоспарн алға тартқан болатын. «Атамекен» өнер ордасында өткен халықаралық конференция түркі елдерінің рухани мәдениетіне арналды.

МҰРАТ САБЫР

ФИЛОЛОГИЯ ҒЫЛЫМДАРЫНЫҢ ДОКТОРЫ, ПРОФЕССОР

Лингвомәдениеттану концепциясы туралы баяндама жасаған башқұртстандық ғылыми қызметкер Луиза Самситова тіл мәселесі өзекті екенін айтады. Тіл арқылы алдымен елдің тарихы жазылады, мәдени және әдеби мұралары жарыққа шығады. Жаңа концепция грамматикамен қоса, өзге саланы да қамтитын болады.

ЛУИЗА САМСИТОВА

БАШҚҰРТСТАН РЕСПУБЛИКАСЫ ҒЫЛЫМИ АКАДЕМИЯСЫНЫҢ СТРАТЕГИЯЛЫҚ ЗЕРТТЕУЛЕР ИНСТИТУТЫНЫҢ БАС ҒЫЛЫМИ ҚЫЗМЕТКЕРІ

Қырғызстанның профессоры Қадырәлі Қонқабаев түркі мемлекеттері ұйымдарынның жұмысын оң бағалады. Әсіресе, қазақ пен қырғыз халқының бауырластығы саясаттан бөлек, білім мен ғылым саласында нәтижеге бағытталған.

ҚАДЫРӘЛІ ҚОНҚАБАЕВ

ҚЫРҒЫЗ ҰЛТТЫҚ МӘДЕНИЕТІ ҒЫЛЫМИ ОРТАЛЫҒЫНЫҢ БАС ҒЫЛЫМИ ҚЫЗМЕТКЕРІ

Конференцияға Өзбекстан, Қырғызстан мемлекеттері, Башқұртстан, Татарстан Республикалары мен Тобольск, Астана, Алматы, Атырау қалаларының түркітанушы ғалымдары және облысымыздың белгілі ғалымдары қатысты. Әр баяндама тіл мен діл, жазба деректері мен ортақ рухани-мәдени мұраны тануға ,одан әрі зерделеуге бағытталған.

Бөрлі ауданы прокуратурасы аудан аумағында орналасқан білім беру ұйымдарында балалардың қауіпсіздігін қамтамасыз ету бойынша талаптардың сақталуына талдау жүргізді.

Мектептерде өрт қауіпсіздігі ережелері қамтамасыз етілмегені анықталды. Атап айтқанда, жертөлелерде жанғыш заттар мен материалдар сақтаған, мектеп ғимаратындағы ықтимал өрттерді сөндіру үшін өртке қарсы сумен жабдықтау көздері жоқ, өрт қауіпсіздігі шаралары бойынша нұсқаулықтар бекітілмеген, өрт дабылдары жұмыс істемейді және т.б.

Бұзушылықтарға қарамастан, мектеп директорлары оларды жою шараларын қолданбай, оқу үдерісін жалғастырған.

Прокурорлық қадағалау актісі бойынша 24 жалпы білім беретін мектептер ӘҚБтК-нің 410-бабының 1-бөлігімен (өрт қауіпсіздігі талаптарын бұзу) әкімшілік жауапкершілікке тартылды.