Батыс Қазақстан облысында ауқымды «Өрт-2026» оқу-жаттығуларына дайындық жүргізілуде. Іс-шара өрт қаупі кезеңіне күштер мен құралдардың дайындық деңгейін тексеруге бағытталған. Республикалық командалық-штабтық оқу-жаттығу табиғи және техногендік өрттер жағдайында төтенше қызметтердің өзара іс-қимылын пысықтау үшін өткізіледі. Толығырақ — келесі репортажда.

Барбастау мен Жаңа өмір елді мекендері маңындағы қоқыс полигонына қатысты мәселе әлі күнге дейін шешімін таппай келеді. Арнамызға хабарласқан тұрғындардың айтуынша, полигон аумағындағы жеңіл тұрмыстық қалдықтар желмен ұшып, халықаралық тасжол бойына дейін шашылып жатыр. Ауыл халқы әсіресе полигоннан шығатын жағымсыз иіске шағымдануда. Тұрғындардың сөзінше, қолайсыз иіс күнделікті өмірге кедергі келтіріп, экологиялық ахуалға алаңдаушылық туғызған. Мәселенің мән-жайын әріптесім Айдос Мәлікұлы тарқатады.

«Не ақшамыз, не баспанамыз жоқ». Осылай деген бір топ тұрғын арнамызға көмек сұрап жүгінді. Ақсай қаласынан пәтер аламыз деген үмітпен құрылыс компаниясына қомақты қаржы аударған салымшылар бүгінде сан соғып қалғандарын айтады. Айтуларынша, уәде етілген баспана да жоқ, салған қаражаттарын да қайтара алмай жүр. Тұрғындардың мұңын тілшіміз Айдос Мәлікұлы тыңдап қайтты.

Батыс Қазақстан облысында шегіртке тұқымдас зиянкестерге қарсы күрес жұмыстары күшейтілуде. Осыған байланысты облыс әкімінің орынбасары Қалияр Айтмұхамбетовтің төрағалығымен арнайы кеңес өтіп, зиянкестердің алдын алу шаралары мен техникалардың дайындығы пысықталды. Жиында жауапты мекемелер атқарылып жатқан жұмыстар туралы есеп беріп, алдағы жоспарлар талқыланды. Айта кетелік, биыл өңірде 455,0 мың га жерді өңдеу жоспарлануда. Зиянкестермен күрес қалай жүрмек? Оларды жоюға арналған техникалар дайынба? Әріптесім Айдос Мәлікұлы айтады.

Батыс Қазақстан облысында балық ресурстарын сақтау мақсатында маусымдық шектеулер мен тыйымдар енгізілді. Бұл шаралар балықтардың уылдырық шашу кезеңінде олардың табиғи көбеюіне қолайлы жағдай жасауға бағытталған. Мамандардың айтуынша, бұл шектеулер балық қорын сақтап, олардың санын арттыруға мүмкіндік береді. Толығырақ келесі сюжетте

Батыс Қазақстан облысында шаруалар алаңдаулы. Жаңақала, Бөкейорда, Жәнібек және Казталов аудандарында киік санының күрт артуы ауыл шаруашылығына қауіп төндіруде. Дала жануарлары елді мекендерге жақындап, қораларға кіріп, үй жануарларымен араласуда. Бұл жағдай жұқпалы аурулардың таралу қаупін күшейтіп отыр. Мамандар киіктер арасында ауру белгілері тіркелгенін айтып, сынамалар алынғанын жеткізді. Қазіргі таңда мәселе құзырлы органдардың бақылауына алынған. Шаруалар нақты әрі шұғыл шешім қабылдауды талап етеді.

Қазақстан халқының бірлігі күні қарсаңында Теректі ауданында аудандық Достық үйінің 15 жылдығына арналған салтанатты іс-шара ұйымдастырылды. Мерейтойлық шара «Достық үйі — татулықтың тұғыры» атты мерекелік бағдарлама аясында өтті. Дөңгелек үстелде қоғамдық келісім мен ұлтаралық татулықты нығайту мәселелері кеңінен талқыланды.

"Әр парақ-АМАНАТ" оқырмандар клубының кезекті отырысы Ұлттық кітап күні, Теректі ауданында өтті. Бүгінгі отырыста жазушы, журналист Бауыржан Ғұбайдулиннің "Биленбеген вальс" әңгімелер жинағы талқыланды. Жиын төңірегінде әріптесім Айдос Мәлікұлы айтады.

Теректі ауданында Чернобыль атом электр станциясындағы апат салдарын жоюға қатысқан азаматтарды еске алу шарасы өтті. Іс-шара аясында ликвидаторларға олардың ерлігі мен жанқиярлық еңбегі үшін құрмет наградалары табысталды. Оқиға куәгерлері радиациялық ластанған аймақта атқарған қызметтері мен ауыр еңбек жағдайлары туралы естеліктерімен бөлісті. Кездесу өз денсаулығын құрбан ете отырып, миллиондаған адамның өмірін сақтап қалған жандардың ерлігін тағы бір мәрте еске салды.

БҚО Теректі ауданы Подстепное ауылында маңызды мәдени оқиға — «Өмір – арман» атты поэтикалық жинақтың тұсаукесері өтті. Жаңа кітап автордың көпжылдық шығармашылық жолы мен терең өмірлік толғаныстарының көрінісі болып табылады. Кеш қонақтары шығармалармен танысып қана қоймай, поэзия мен жеке тағдырды тоғыстырған ерекше атмосфераны сезіне алды. Іс-шара әдебиет сүйер қауымды біріктіріп, автор мен оқырман арасындағы ашық пікір алмасу алаңына айналды.