Алматы облысында «Альби» ломбардтар желісінің заңсыз қызметі әшкереленді. Қаржылық мониторинг агенттігінің мәліметінше, компания ломбард қызметін жүргізу құқығынан айырылғанына қарамастан, атауын өзгертіп, Алматы және Түркістан облыстарында жұмысын жалғастырған. Кепілге зергерлік бұйымдарды қабылдап, халыққа күніне 2 пайыздық өсіммен қарыз берген. Бұл заңда белгіленген 0,3 пайыздық шекті мөлшерлемеден алты есе жоғары. Қарыз шарттары бұрынғы «Альби-Ломбард» компаниясының мөрі басылған кепіл билеттерімен рәсімделген. Ал ақша айналымы қолма-қол және күдіктілер бақылауындағы жеке кәсіпкерлердің банк шоттары арқылы жүргізілген.